ORANJESTAD (AAN)-- Parlamentario Hendrik Treveden, Lider di fraccion di MEP, a expresa palabranan di felicitacion na Centro di Bario Dakota, cu siman pasa tabata un “soft opening” riba e veld di basketball.
Treveden a menciona cu Centro di Bario hunto cu CEDE Aruba y Gobierno, a logra di habri un cancha di basketball pa e hobennan di Tarabana, Dakota y vecindario por practica nan deporte, den e centro di bario mes.
“Manera ta conoci for di 2017 nos a bin percura ta percura pa mira cambionan den e bario, y poco poco nos ta mira cu esaki ta wordo concretiza. Centro di bario mes, hunto cu veilige barios, minister di deporte actual y esun anterior, a mira desaroyonan positivo nos ta mira cu ainda awe, den 2023, mas desaroyo positivo ta wordo cumpli y e cancha di basket a haya un cobertura di plastico special, unda cu e muchanan por hunga riba dje sin peligro di cay, un producto masha moderno mes cu ta resisti e solo fuerte di Aruba, pero tambe ta haci mas facil pa nan practica e deporte aki”, Parlamentario Treveden a señala.
El a agrega cu fraccion di MEP ta hopi contento pa mira e progreso den bario, y na scolnan. El a referi tambe na Fatima College cu a wordo completamente asfalta, Pius-X tambe e parti patras, unda gobierno a percura tambe pa asfalta dilanti, cu ayudo di instancianan comercial. Pues, un combinacion di bini hunto, pone man na obra pa mira con e bario ta desaroyando.
“Pues, nos ta spera cu den e lunanan nos dilanti di 2024 nos por logra tambe cu e veld di futbol den e CBD tambe por wordo mehora, pa asina aki, e team campeon Dakota tur dia, por sigui practica e deporte”, Hendrik Treveden a subraya.
