Minister Oduber relaciona cu discusion riba vehiculonan UTV's/ATV's:
ORANJESTAD (AAN): E discusion relaciona cu e tipo di tours cu tin na Aruba (turismo di aventura) y cu ta causando daño na naturalesa ta uno cu a wordo hiba pa hopi aña, pero actualmente el a bolbe lanta cabes mirando cu tin accionnan y pruebanan cu ta delata e tipo di actividadnan aki.
Minister di Turismo demisionario Dangui Oduber a laga sa cu e Comision di Flora y Fauna a duna diferente conseho y si ta pa nan, nan mes no ta desea di tin UTV's, pero tin cu tene cuenta cu Aruba tin cu keda ofrece e tipo di actividad controla y regula na e bishitantenan.
El a agrega cu tur conseho gobierno ta tene cuenta cu ne, pero no por sigui tur e consehonan den un 100 porciento pasobra den e caso di e Comision Flora y Fauna lo desea pa no tin UTV's/ATV's mas.
Segun Oduber, e deseo aki ta bira dificil pasobra na final di dia tin hopi compania cu ta ofrece e servicio aki na turistanan. Tin hopi hende na Aruba cu ta depende directamente di entrada di e tipo di actividadnan aki cu ta wordo ofreci turisticamente, a merca.
Sinembargo, e mandatario a bisa cu gobierno ta tene cuenta cu e consehonan y nan lo considera nan sigur como partner den e desaroyo sostenibel cu ta papiando di dje pa futuro.
