Fraccion AVP a bishita ImSan den encuentro fructifero di Comision di Salud

ORANJESTAD (AAN): Recientemente durante un reunion di Comision di Salud, fraccion AVP a participa den un encuentro fructifero cu e management team di ImSan na San Nicolas,

y tambe a ricibi un tour di e facilidadnan. E bishita a brinda oportunidad pa conoce mas di cerca e trabao importante cu ImSan ta realiza diariamente pa garantisa cuido y servicio di calidad pa nos comunidad.

   Durante e encuentro a wordo intercambia informacion tocante diferente aspecto di e sector di salud, incluyendo e reto nan actual y e importancia di continua fortaleciendo colaboracion entre e diferente instancianan envolvi. Fraccion AVP a expresa su aprecio pa e esfuerzo y dedicacion di tur e profesionalnan cu ta traha den sector di salud na Imsan pa cuido di nos pueblo.

   Segun fraccion AVP, dialogo habri y comunicacion directo cu institucionnan manera ImSan ta esencial pa logra mihor entendemento di e necesidadnan den cuido di salud y pa identifica solucionnan sostenibel pa futuro. Bishitanan manera esaki ta contribui na mas cooperacion y ta permiti pa haci decisionnan mihor informa den beneficio di comunidad.

   “Nos ta aprecia e oportunidad pa conoce mas di cerca e trabao importante cu ImSan ta haci. Dialogo, cooperacion y informacion directo ta esencial pa sigui fortifica nos sector di salud,” fraccion AVP a expresa.

   Fraccion AVP ta reafirma su compromiso pa continua traha riba iniciativanan cu ta contribui na un sistema di salud eficiente, accesibel y di calidad pa tur ciudadano di Aruba.