Ministro Rene Herdé encuanto placa di belasting di motor
ORANJESTAD (AAN): Minister Rene Herde, den un entrevista cu DIARIO a aclarea discusionnan cu pa hopi aña caba ta tumando luga tocante destinacion di placa di impuesto di vehiculonan di motor. El a splica cu pa decadanan ta mesun pregunta ta bin dilanti cu ta di con no ta destina e placa aki den su totalidad pa nos careteranan.
El a splica cu semper a scoge pa pone e placa di impuesto di vehiculonan di motor den e fondo general y di e fondo ta destina un suma pa infrastructura, entre otro pa drecha caminda, asfalta, rioolering etc. “Esaki”, e minister a enfatisa, “semper a resulta mucho tiki”, pa e trabaonan cu tin pa haci.
El a menciona cu el a propone un plan pa cambia e rumbo cu nos ta bayendo aden pa hopi aña, enfatisando cu si nos sigui asina, nos structura di caya, aceranan, riolering, etc., ta keda bay atras . El a trece su proposicion tanto den Conseho di Ministro como na Parlamento.
E minister a haya aprobacion di Conseho di Ministro pa cuminsa un investigacion pa bin cu un plan pa structuralmente percura pa infrastructura haya mas atencion.
“E investigacion ta bay cuminsa awo y ta spera cu e lo keda cla prome cu fin di aña pa asina nos por tin miho bista cuanto placa nos por haya, di unda nos por haya e placa, y con nos por destin’e di un forma structura pa un termino largo di entre 10 pa 15 aña. Actualmente mi mester depende di e sumanan cu mi ta haya di presupuesto”, el a expresa.
Minister Herde a remarca cu no ta e intencion pa pone mas impuesto riba nos ciudadanonan. Loke e ta propone ta un redestribucion di e placa di impuesto di vehiculonan di motor y no di sumanan acerca. E impuesto aki pa aña ta produci mas o menos un 28 miyon Florin. Aunke, segun e minister, esaki ta bon pero no suficiente. Pero toch e ta mas hopi di e 17 miyon Florin cu tin presupuesta actualmente pa infrastructura y lo por haci mas.
Na final, Minister Herde a enfatisa, cu ta trata aki di un discusion no solamente di prioridad, sino di balansa pa cubri tur gasto di pais Aruba. “Y di ningun forma e intencion ta pa aumenta impuesto pa cubri esaki”, el a expresa.
