FPNM: Maneranan con pa anda cu rivalidad y conflicto entre rumannan

Tur relacion tin nan momentonan di tension y desacuerdonan, pero tambe momentonan di resolve problemanan.

Dentro di un famia, un mucha por siña resolve conflicto, specialmente ora e ta relata na conflictonan entre rumannan. 

Aki ta sigui algun tactica pa yuda anda cu conflicto y rivalidad entre rumannan y trece paz den cas: 

1. Yiunan mas grandi por yuda den cuida nan rumannan mas chikito

Esaki lo encurasha bo yiunan pa sinti envolvi y contribui na e famia. Pero, ta importante pa no abusa di esaki door di duna bo yiunan mas grandi e responsabilidadnan cu ta pertenece na mayornan. Esaki por causa sentimento di rabia entre rumannan enbes di crea un miho relacion. 

2. Evita di compara bo yiu(nan) cu otro

Cada individual tin nan aspectonan fuerte y talentonan cu lo mester wordo encurasha. Esaki ta siña nan aceptacion y aprecio pa ta un persona unico. 

3. Encurasha e resolvimento di conflicto sin interveni

Ta bon pa semper crea limitenan pa cu conflicto, pero ta importante pa permiti oportunidad pa rumanan papia y resolve e conflicto riba nan mes, sin cu abo como mayor ta interveni mucho. 

4. Sentimento di rabia mester wordo trata prome cu por yega na un resolucion satisfactorio

Pone limitenan pa cu cua comportacion ta aceptabel y cua no. Dalmento, yama otro nomber, y rebaha otro no ta aceptabel y como mayor bo lo mester interveni si bo yiunan cuminsa trata di uza e tacticanan aki pa purba di resolve e problema. 

5. Disciplina ta miho ora e ta wordo haci den priva y no dilanti otro rumannan

Ora ta disciplina dilanti rumannan, esaki por causa cu e situacion por escala y e conflicto entre rumannan ta cuminsa atrobe. 

6. Ta importante pa cada ruman por tin nan mesun espacio

Si no ta posibel pa tin cambernan separa, organisa nan camber den un manera cu nan cada un por tin nan propio pertenencianan. Tin regla cu ta siña nan respeta e pertenencianan di otro. Por ehempel: puntra prome pa fia algo y tene bo cosnan limpi. 

7. Pasa tempo individual cu cada un di bo yiunan door di haci algo cu nan gusta

Esaki lo pone nan sinti special. E tambe ta un oportunidad unda bo por dun’e bo atencion sin strobacion, hasta si e ta djis pa un rato so. 

8. Tene reunion di famia cada pasa tanto tempo

Esaki por ta un oportunidad unda e yiunan por vocifera nan diferencia of kehonan y yega na un solucion. E tambe ta un oportunidad cu e mayornan por recorda e famia di e reglanan existente, con pa trata otro, y introduci reglanan nobo. 

Fuente: https://childdevelopmentinfo.com/parenting/9-ways-deal-sibling-rivalry/

Pa informacion of pregunta por acerca Fundacion Pa Nos Muchanan - Cumana 2