Forza Aereo Hulandes ta haya un drone MQ-9 Reaper y lo cuminza test esaki den Caribe

Nan lo ricibi cuatro di nan na Februari venidero

ORANJESTAD (AAN): Na luna di Februari 2022, Forza Aereo Hulandes ta bay ricibi na nan disposicion cuatro drone special cu yama MQ-9 Reaper.

   Ta trata di 4 drone den forma di avion di inteligencia sin tripulacion, y ta bin cu nan 4 base-station cu ta ser yama Ground Control Station (GCS).  E aparatonan aki tin motor turbo-prop cu tanki grandi di jet fuel, y desde den laira por colecta data y informacion.

   Segun Defensa Hulandes a indica, cu por lo pronto lo ehecuta test cu e sistema sin arma na Curacao. Esey tin di haber cu e circunstancianan di tempo cu ta bentahoso den Caribe, y tambe e disponibilidad di e espacio aereo.

   Tambe e Reaper ya caba por worde desplega den Region Caribe pa tareanan di Defensa. Por ehempel na momento di sosten na autoridadnan civil of pa deteccion of vigilancia. Den esaki lo colabora parcialmente cu Merca, por ehempel durante operacionnan antidroga.

   E avionnan y e 2 base-station lo keda staciona na Aeropuerto Hato.  E 2 otro base-station lo wordo ubica na Base Aereo na Leeuwarden. For di aki e imagennan procedente di Region Caribe ta keda analiza.  E MQ-9 al final lo haya Leeuwarden tambe como su base principal.

   E Reaper tin sensornan cu pa ratonan largo por observa tanto riba tera como den laira riba laman y colecta informacion, sin cu tin un piloto abordo. Debí na e control via satelite, e aparato por wordo pilotea rond mundo via remote-control.

   E sistema ta pas completamente cu e deseo di Defensa Hulandes pa opera a base di accionnan militar impulsa pa informacion.

   E avion MQ-9 Reaper por bula cu velocidad maximo di 440 km/h, e por yega altura di maximo 50.000 pia, y e por bula un maximo di 27 ora largo prome cu e tin di ateriza bek.

   E avion ta 11 meter largo, y su halanan tin un hanchura di 20 meter.

   E ta dispone un Camera sofistica cu ta duna imagen stabil, di resolucion halto, y ta capta imagen den Infracora tambe.  E imagennan aki ta wordo transmiti en vivo directo pa e Base-Station.  E tin laser abordo tambe cu por midi distancia di obhetonan.

   E imagennan aki ta bay directo pa e Base Aereo na Leeuwarden (Hulanda) unda analistanan di imagen ta check tur esaki den real-time, mientras e avion ta bulando den Caribe.

   E imagennan por bay wordo manda ‘live’ tambe pa e.o. Botonan Hulandes di Marina den Caribe, pa asina nan mira mesora si acaso ta un Speedboat tipo Go-Fast ta moviendo y tambe por mira claramente ki tipo di droga e tin abordo.