Diego de Cuba, lider di STA:
ORANJESTAD (AAN) – Diego de Cuba, lider di Sindicato STA, den un entrevista cu DIARIO a bisa cu e Foro tocante Adulto Mayor cu a tuma lugar, un par di siman atras, tabata un bon iniciativa. Pero awo, lo mester forma un comision di experto den e materia di adulto mayor.
Na su opinion, aworaki loke gobierno mester bay haci ta bay forma un Comision y bay studia tur locual cu tin di wordo studia. “Y nan tin hendenan cu hopi experiencia riba e tereno aki, y tin cu uza e hendenan ey. Kiermen, forma un Comision di hendenan cu sa kico ta come y bebe den e mundo aki di adulto mayor”, De Cuba a indica.
El a sigui bisa cu tin hopi escenario. Entre e adultonan mayor tin hende cu ta hopi bon na tino, pero nan no por move pasobra nan pianan ta nenga. Tambe tin otro hendenan cu sufri di demencia, cu ta birando un grupo grandi. “Mi no sa kico ta e fenomeno cu ta causando esey, pero e parti di nutricion di nos grandinan tambe ta algo cu mester tene cuenta cu ne”, De Cuba a expresa.
El a agrega cu na Aruba tin hende manera den Departamento di Salud, Wit Gele Kruis, hendenan cu ta traha den casnan di nos grandinan, manera SABA, etc., cu por forma un comision pa trata e problema. “Tin adulto mayor cu ta sinti nan mes lubida, discrimina, y esey no mester ta asina. Ami tin un aprecio masha grandi mes pa e adultonan mayor y cu un tiki suerte, cu poder di Dios, nos tambe lo yega eybanda, pero e personanan aki, pa mi tin hopi valor. E hendenan aki a traha duro pa awe nos tin nos pais. E hendenan aki tin masha hopi experiencia cu por duna bo un monton di conseho, pero kico ta pasa? Nos a drenta un mundo digital, y tin adulto mayor cu ta hopi bon den dje, pero tin otronan cu ta perdi den dje” Diego de Cuba a subraya.
