Solange Tchong, PR di AZV:
ORANJESTAD (AAN) – Solange Tchong, Relacionista Publico di AZV, den un entrevista cu DIARIO a expresa cu ta hopi nice y interesante pa wak cu despues di 22 pa 23 aña di existencia di dicho institucion, e ta bin cu un derecho y beneficio nobo pa su ciudadanonan asegurado.
Bayendo algun minuut bek den historia, Solange Tchong a recorda cu na 2001 AZV a sali como un “play” di seguro medico pa Aruba, y na cierto momento mester a haci e escogencia kico ta bira e pakete. Esaki tabata hancra y defini den un ley di hopi aña anterior cu esey. E ley a wordo skirbi na aña 1992 caba.
Pero a tuma hopi aña prome cu a introduci’e pasobra hustamente, ta bay wak kico ta e teoria y kico ta loke por ofrece den practica, locual ta wordo defini door di e infrastructura: ki tipo di specialismonan y di paramediconan tin riba e isla.
Solange Tchong a sigui elabora riba e beneficio nobo. Den e caso aki e pakete di AZV a wordo amplia y a duna awo na e asegurado, e derecho riba Logopedia. “Esey kiermen cu adulto y muchanan cu tin ayudo di Logopedista, kiermen un experto den loke ta e organonan di habla of comunicacion di lenguahe, pues orea, boca, con bo ta papia, con bo ta hala rosea, etc., tur esey a drenta den e pakete di AZV.
Esaki ta algo hopi positivo y hopi bunita, y AZV no a para keto. E ley, berdad a pasa, na comienzo di September. Es decir cu e asegurado a haya e derecho riba Logopedia, desde inicio di September 2023, pero ta asina si cu AZV di su banda no a para keto pasobra e mester a cuminza traha, y esey kiermen mester prepara”, Tchong a señala.
Dentro di e trayecto aki esey a nifica cu AZV mester a informa su aseguradonan y a haci esaki por medio di un comunicado, a informa cu e derecho aki a drenta den e pakete pero cu ta un trayecto cu ta bay tuma su tempo, pasobra AZV tin cu prepara esaki.
