Minister Ursell Arends ta anuncia:
ORANJESTAD (AAN): Dialuna 30 di october durante un rueda di prensa Minister Arends a anuncia cu cuminsando 4 di november te cu 16 di december lo acepta desperdicio di azeta di cushina residencial na Baki den Bario.
Baki den Bario cu ya caba tin algun luna andando ta un actividad unda cu ta trece diferente baki di desperdicio na cada districto di Aruba. Hende por trece nan desperdicio separa pa asina wordo procesa debidamente. Pues locual cu ta wordo colecta na Baki den Bario ta desperdicio cu lo tabatin chens di termina den nos naturalesa.
Despues di a tende for di nos comunidad, a añadi mas tipo di desperdicio cu ta wordo acepta na e lista. A cuminsa cu desperdicio di bulk, construccion, metal, green waste y e-waste y incorpora desperdicio di carton y taira den e trayectoria di Baki den Bario. Awe Minister Arends a anuncia cu tambe por trece azeta di cushina uza.
Azeta di cushina ta un problema grandi pa nos tuberianan na cas y pa nos sistema di rioolering. Pues e awa mescla cu azeta cu ta yega nos RWZI ta afecta e planta negativamente. Di tur e azeta di cushina cu Aruba ta importa, solamente 15 pa 20 porciento ta wordo exporta pa recicla. Apesar cu nunca lo nos por yega 100%, door di e azeta cu ta wordo absorbi den nos cuminda, tin hopi espacio pa mehoracion den e problematica aki.
Pa e motibo aki a anuncia un colaboracion cu Paradise Scrap cu ta un compania cu ta colecta azeta di cushina y ta exporta esaki pa debido procesamento. Tur azeta di cushina cu nan ta colecta ta wordo recicla y converti den ‘bio fuel’. Paradise Scrap lo tin un baki na cada evento di Baki den Bario cuminsando 4 di november unda cu nan lo colecta azeta di cushina. Ta pidi tur esnan cu lo haci uzo di nan servicio na Baki den Bario pa por fabor trece nan azeta den contenedornan bon cera pa asina preveni cu esaki lo basha.
Minister Arends ta pidi tur esnan cu lo haci uzo di Baki den Bario na Savaneta e fin di siman aki pa prepara y separa bon di antemano mirando cu hopi hende ta bin trece nan desperdicio y lo probablemente tin fila largo di auto.
Ta haci un yamado na pueblo di Savaneta pa separa y trece nan desperdicio diasabra awor na Veld di Undesa for di 7’or te cu 11’or di mainta.
