Companianan priva ta paga expertonan segun necesidad y produccion - *Pasobra placa no ta cay for di cielo, politica no por hunga San Nicolas - *Un Gobierno cu no baha su gastonan, mester subi belasting na e pais
ORANJESTAD (AAN) — Cada bez cu produccion y maneho di e aparato gubernamental bini na discusion, un comparacion ta wordo haci.
Ta cuminsa cuestiona cuanto un empresa priva ta paga un experto pa haci su trabou y cuanto Gobierno (cu ta e pagador di belasting) ta paga pa trahadornan di Gobierno.
Uno di e asuntonan cu a duna credibilidad na Prome Ministro Wever-Croes como dirigente gubernamental tabata, cu el a traha riba baha gasto pa e Arubianonan cu mester paga belasting pa asina Gobierno por cubri su gastonan.
Ta trata di algo cu ta sumamente importante pa Pueblo en general, sigur si tuma nota di e forma cu mundialmente hasta prijs di cuminda ta subi y cada cent cu Pueblo mester gasta, ta un peso pa e ciudadano.
Un hende honesto ta admiti, cu trabou den Gobierno a wordo abusa dor di cantidad di politico cu tabata tin mas interes pa haya mas voto, cu pa percura pa belasting no bira un abuso di Pueblo.
E hecho cu Prome Ministro Wever-Croes a traha riba bahamento di gasto di Gobierno hunto cu otro miembronan di su Gabinete, ta prueba cu e ta traha na interes di e ciudadano cu ta traha den Gobierno y pafor di Gobierno.
Empleadonan di Gobierno cu merece elogio pa e trabou cu nan ta haci, hopi bez ta bira victima di e pensamento publico, cu un empleado di Gobierno no por haci un bon trabou.
Esaki directamente ta relata na e hecho, cu hende cu no ta cualifica pa haci nan trabou, a wordo tuma den servicio di Gobierno sin cu nan por cumpli cu e debernan y tareanan cu nan trabou ta encera.
Un empresa priva ta tuma hende den servicio pasobra e tin necesidad di hende pa traha.
Sigur den e situacion dificil cu Aruba conoce, ningun empresa priva ta tuma hende cu no ta capacita pa haci su trabou.
Ora papia di gasto di Gobierno, directamente e prome pensamento ta bay na Parlamento como modelo di prestacion a base di e placa cu Pueblo ta paga.
Nos ta ripiti un pregunta cu tanto bez nos a haci, si di berdad mester di tanto Miembro di Parlamento pa Aruba. Nos ta basa nos mes riba cifranan historico real.
Na mes momento nos ta cuestiona e salario di Miembronan di Parlamento, cu ta indicativo pa e salarionan cu Gobierno ta paga na e personanan den posicionnan mas halto den e aparato gubernamental.
Manera Hulanda a demostra cu cifra, si Aruba no tabata tin Hulanda, Aruba lo a bati bancarota. Por algo tabata tin e Drama di Fort Zoutman y Prome Ministro ta muri di hamber, ora Hulanda a bisa cu ta basta.
Na e momento aki, Prome Ministro Evelyn Wever-Croes mester actua manera e ta haci na interes di Aruba y mester pone un paro na salarionan cu Aruba no por paga.
Aruba mester paga e personanan cu e ta nombra na e puestonan mas halto di e pais, segun e placa cu e Pueblo tin pa paga pasobra placa no ta cay for di cielo.
Hulanda tin razon cu e ta bini cu e exigencia aki cu ta na interes di Aruba y cu Prome Ministro Evelyn Wever-Croes ya a traha ariba.
Siman pasa DIARIO a adverti cu mundialmente prijsnan ta subi. Bida ta bira mas dificil pa Pueblo cu mester paga belasting, pa Gobierno por tin placa.
Si Gobierno Wever-Croes no para firme cu e ta baha gasto y entre otro no ta pone un limite na e salarionan mas halto den Gobierno, e mester subi belasting pa e pais no bay bancarota.
Ministerionan, companianan di Gobierno y tur entidad cu ta wordo paga dor di Gobierno, mester conoce un maximo pa salarionan mas halto cu Pueblo ta paga den situacionnan mundial sumamente dificil.
