Formador a splica cu keto bay edad di pensioen pa awor ta keda na 65 aña

ORANJESTAD (AAN): Den su declaracionnan riba e di 4 dia di reunion cu stakeholders, Prome Minister Evelyn Wever-Croes a elabora riba e reunionnan cu sindicatonan.

  Gobierno a duna un presentacion di loke ta inclui den e landspakket y loke ta trata e posicion di ambtenaar. A duna un splicacion amplio di full e timeline y kico tur a worde palabra. E sindicatonan tabata tin algun pregunta cu a logra contesta di biaha.

   Riba e tema si ta berdad a keda dicidi cu e edad di pensioen a bira 66 aña, Prome Minister a indica cu esaki tampoco ta e caso. Pa Aruba e edad di pensioen ta yega 65 aña na aña 2024. Esaki ta un decision y ley cu e gabinete anterior bou sr. Mike Eman a pasa na 2014, indicando cu den un periodo di 10 aña lo hisa e edad di pensioen. Esey ta e unico cos cu tin awor.

   Den cuadro di Landspakket a keda acorda cu lo bay haci un investigacion otro aña con fuerte e fondo di pensioen ta. Ora esaki ta cla e ora lo bay papia kico mester haci pa e fondo ta fuerte. Por haci hopi cos berdad pa haci e fondo mas fuerte y un di nan lo ta pa hisa e edad di pensioen.

   Un otro pregunta cu sindicatonan tabata tin ta si ta berdad cu ya tur cos a worde dicidi caba y empleadonan no tabata tin nada di bisa. Prome Minister riba e pregunta aki a enfatisa cu nada a worde dicidi pa loke ta trata empleadonan publico. Aworaki apenas tin e inventarisacionnan, e estudionan ta tumando luga.

   “Nos a palabra cu sindicatonan cu asina un di e estudionan ta cla, nan ta e promenan pa hañe pa asina nos por sinta na mesa y dialoga over esaki tambe pa nos yega na e miho resultado posibel”, Prome Minister Evelyn Wever-Croes a duna di conoce.