ORANJESTAD (AAN): Diahuebs mainta Prome Minister Evelyn Wever Croes a tene un conferencia di prensa unda cu el a papia riba su reunionnan cu e tabata tin cu Banco Central y AHATA, como Formador.
“Tabata bon reunionnan y Banco Central a enfatiza hopi riba e fundeshi monetario financiero, pero tambe riba desaroyo economico y unda nos como Gobierno lo kier hiba Aruba den e siguiente añanan”.
Den esaki nos ta papiando ya caba no di ‘business’ as usual’, pasobra esey no ta factible mas, sino riba con nos ta transforma nos modelo economico pa asina cada ciudadano por crea su propio progreso y bienestar, segun e Prome Mandatario.
El a sigui bisa cu a papia tambe riba con Banco Central su rol ta bay ta den e desaroyo economico.
Wever Croes a splica cu el a papia cu AHATA riba temanan di relevancia pa turismo.
El a splica cu AHATA tambe a trece dilanti cu participacion den e sector aki ta hopi importante.
“Participacion den decisionnan di Gobierno, manera por ehempel reforma fiscal”.
A pidi atencion tambe pa temanan urgente manera e status di nos planta, Riool Water Zuiveringsinstallatie (RWZI), e problematica di vehiculonan UTV y ATV y e temanan di ley laboral, como tambe e recomendacionnan pa BTW etc, segun e Prome Mandatario.
El a bisa cu ambos reunion a bay na un manera hopi positivo, unda cu tabata tin tambe consehonan valioso cu a bin dilanti.
