ORANJESTAD (AAN): Diamars atardi pa 4:00 pm, Oslin Benny Sevinger a sali bek despues cu su detencion a wordo suspendi temporalmente for di Prison di KIA, despues cu Huez-Comisario a bay di acuerdo cu e peticion di su abogado, y cu Ministerio Publico no a resisti contra esaki.
Su prome declaracion unavez cu el a yega pafo, ta un dicho cu e ta bin ta bisando hopi ultimo temponan, esta cu ‘El que nada debe nada teme”.
El a bolbe pinta su detencion den e caso Avestruz como uno di ‘persecusion politico’ di MEP, y a subraya cu e lo bay bringa duro pa sali for di esaki, y a añadi “E no ta bay ta un proceso facil”.
Sevinger ta sigui tilda MEP pa e investigacion di corupcion aki, y e ta yam’e “un persecucion politico”, indicando cu MEP kier cera Benny y caba cu Benny y sak’e for di politica.
Ministerio Publico e mesun atardi a emiti un boletin, unda a mustra cu Fiscal no a opone contra liberacion di e sospechoso. A agrega tambe cu e investigacion rond di e caso Avestruz ta casi yegando su final.
Pero Ministerio Publico a splica si, cu nan a pone condicionnan na e suspension, cu a wordo acepta pa Huez-Comisario.
HURAMENTACION: Alavez riba Diabierna merdia pa 1:30 pm, Gobernador ta sperando Benny Sevinger na e Cas Ceremonial di Gobernador net banda di Lagoen, unda e lo bay huramenta como Miembro di Parlamento di Aruba. Debi na e reglanan pa mitiga brote di Covid-19, Sevinger mag di hiba maximo 2 persona.
Gobernador a ricibi nota di Staten, cu Benny Sevinger ta desea di presta huramento (y no e declaracion y e promesa) dilanti Gobernador.
Manera ta conoci, den eleccion di 25 Juni 2021, Benny Sevinger cu tabata candidato #29 di Partido AVP, a saca 1.614 voto individual, pues a haya derecho pa bira Parlamentario.
E potret aki ta uno di archivo.
