SOGA a para e construccion pero contratista a sigui:
ORANJESTAD (AAN) – Presidente di Sindicato di Enfermeronan di Aruba (ABV) Gina Maduro, a splica miembronan di prensa pa cual motibo tabata tin accion di trahadornan pafo di e entrada di Hospital dr. Horacio Oduber.
Esaki pa motibo cu no ta prome biaha cu ta surgi un incidente den e parti unda tin construccion. Maduro a splica Diamars cu a pasa den e Departamento di Opname, y otro oficinanan unda cu na parti ariba construccion ta tumando lugar, bloki grandi a cuminza bin abao unda cu e miembronan a cuminza yama e sindicato mesora, y nan a constata cu berdad e situacion ta insigur.
Di biaha nan a reuni cu SOGA, cu a duna e contratista ordo pa nan para e parti di construccion, mientras cu e departamento tin chens di muda. No obstante, e peticion pa para e construccion e contratista ta sigui insisti, manera cu SOGA no tin autoridad riba e contratista aki y ta keda haci su trabao manera nada no a pasa.
Den e transcurso di diahuebs cu diabierna mainta, e trahadornan a bisa cu ta basta, pasobra ta yega momento cu no por garantiza e seguridad di trahador y pashent den e area di Opname Afdeling. Pesey e sindicato a saca e trahadornan concerni pafo un rato, mientras ta busca otro alternativa.
