ORANJESTAD (AAN): Manera DIARIO a trece dilanti, Diahuebs venidero e facultad di Hospitality and Tourism Management Studies (FHTMS) di Universidad di Aruba,
lo tene un Anochi di Informacion encuanto nan programa pa educacion di Master’s.
E dama Salys Sultan, kende ta coordinadora pa e estudio di SISSTEM na e Facultad di Art & Science, a confirma cu nan tin e Anochi di Informacion riba Diahuebs 28 di April 2022, for di 6:30 pm te cu 8:00 pm. E ta un Open House unda interesadonan por haya sa tur detaye di e Master’s Program na Universidad di Aruba.
Segun Sultan, e lo bay tey pa duna informacion di e programa di MSc SISSTEM, cu ta sostenibilidad pa engineering. Si bo ta busca pa trece cambio na mundo, of si bo ta buscando forma pa cambia bo veld, of profundiza den sostenibilidad, bo por bay check kico e estudio aki tin di ofrece.
Ademas di esey, Salys Sultan a splica DIARIO cu aplicacion pa e MSc SISSTEM ta habri dia 15 di Mei 2022, cu deadline dia 15 di October 2022. Nan lo acepta studiantenan basa riba nan carta di motivacion, y considerando experiencia profesional.
Tambe nan ta ofrece un Pre-Master cu ta cuminza na 29 di September 2022, unda nan lo duna componente segun cada necesidad di studiantenan, y e lesnan aki lo cuminza na Februari 2023.
E estudio di MSc SISSTEM ta uno cu ta part-time y ta dura 2 aña.
