Ghislaine Koeiman di Famia Planea: No por papia di crisis di embarazo hubenil:
ORANJESTAD (AAN)—Ghislaine Koeiman, di Fundacion Famia Planea Aruba (FPA), den entrevista cu DIARIO a menciona cu e fundacion tin un colaboracion hopi bon for di CBS, encuanto embarazo hubenil.
Cada cuartal FPA ta hay e cifranan y aworaki no por papia mas di un crisis pa loke a embarazo hubenil, pero na locual nan ta poniendo hopi atencion riba dje, ta e malesanan cu ta wordo transmiti sexualmente. “Esaki tambe nos ta enfoca den nos presentacionnan, e importancia di proteha bo mes, pasobra hopi tin miedo di papia, tin miedo di puntra, vooral si ta un pareha nobo, por ehemplo, puntra ‘bo a yega di test? Cuanto pareha bo tabatin prome cu mi?’ Esey si nos tin cu bisa cu ta lantando cabes na e momentonan aki” Ghislaine a señala.
Ghislaine Koeiman a indica cu p’esey FPA ta papia cu e hobennan, cu si acaso nan a cambia di pareha of si nan tin mas cu un pareha, locual por pasa tambe, pa ta conciente di haci nan test sea via DBZ of via docter di cas, p’asina nan ta sigur cu nan ta ok.
“Famia Planea semper a para pa loke ta salud sexual di cada persona, pa nan ta conciente di esaki, y p’esey nos ta keda enfoca busca informacion, proteha bo mes, no solamente abo pero e otro persona cu bo ta cu ne, tambe”, Ghislaine Koeiman a remarca.
