ORANJESTAD (AAN): Bon noticia suministra door di Lilly Marlene Peterson, MA kende a splica cu Fonds voor Cultuurparticipatie a aproba e proyecto aki cu yama ‘Caquetio, Africano Europeano: Nos tur ta un famia”.
E adulto mayor ta e yabi di e pasado y e porta na e futuro. E pensamento aki a forma e fundeshi di e proyecto Caquetio, Africano, Europeo: Nos tur ta un famia
E proyecto aki ta e resultado di e disculpa di premier Rutte dia 19 di December 2022 y di Rey Willem-Alexander cu a pidi pordon pa e sclavitud transatlantico Hulandes dia 1 di juli 2023. E aña 2023-2024 a worde declara e aña di Conmemoracion di sclavitud Hulandes transatlantico den reino Hulandes. Y Hulanda a duna dos miyon euro pa proyectonan den reino durante di e aña di conmemoracion. Un miyon euro a bay na Mondriaan Fonds y un miyon euro a bay na Fonds voor Cultuurparticipatie pa nan parti pa proyectonan. Den cuadro di esaki Fonds voor Cultuurparticipatie a aproba e proyecto personal Caquetio, Africano, Europeano: Nos tur ta un famia, di life coach y museologo Lilly Marlene Peterson MA y su team.
Manera e nomber di e fondo ta informa nos e proyectonan cu worde aproba mester inclui e partcipacion di gruponan den comunidad. Señora Peterson a scohe e adulto mayor di cua su hendenan tabata sclavisa of tabata tin escalvo aki na Aruba como su grupo di enfoke. E ta mira e adulto mayor como e yabi na e pasado y e porta pa e futuro. Y e ta spera di conecta e adulto mayor ainda mas cu su famia.
Señora Peterson su inspiracion pa e proyecto aki a bin parcialmente di e buki Ons eilandje Aruba di señora Laura Wernet-Paskel cu a worde publica den aña 1992. Laura na pagina 38 ta conta nos e siguiente: “Dat de mensen zich na de afschaffing van de slavernij toen werkelijk een voelden, blijkt uit hun vrijheidslied met dit Frans getinte refrein:
Liberté, egalité.
Nos tur ta un.
No tin catibo mas.
Den traduccion esaki ta lesa: E cantica di libertad ta e muestra cu despues di e abolicion di sclavitud hende a sinti nan mes berdaderamente un.
E cantica di libertad ta bisa “Nos tur ta un.” Señora Peterson kier sa di e grupo di enfoke con a para cu e unificacion cu Laura ta papia di dje. Tambe e kier sa ta ki trabao tin pa haci 160 aña despues di e abolicion di sclavitud. Pesey señora Peterson ta puntra e adulto mayor pa yud’e contesta e pregunta si tras di e nomber di e proyecto mester bin un signo di slamacion: Nos tur ta un famia! Of un signo di pregunta: Nos tur ta un famia?
Dicon contesta e pregunta sensitivo aki? Dikon busca informacion di bo pasado? Esey ta bo so por dicidi. Tin hende cu ta bisa laga e pasado den pasado. Cu otro palabra nan no kier sa. Tin hende cu no ta worry y tin hende cu si kier sa. Busca informacion en conexion cu bo pasado ta un proceso personal y ta abo so por dicidi si bo kier sa e storia di bo famia en relacion cu sclavitud.
Cu e proyecto aki señora Peterson ta ofrece ayudo na e adulto mayor cu kier sa si nan tin ancestro cu tabata sclavisa. Pa yuda cu esaki señora Peterson lo laga traha un pelicula di instruccion con pa haya acceso e registro di catibo riba e website di Archivo Nacional Aruba usando bo telefon.
Ora bo subi e website www.coleccion.aw y drenta den e registro di Archivo Nacional Aruba y busca bo informacion. Porta bo a descubri cu bo hendenan tabata sclavisa aki na Aruba. Por ta bo a descubri cu bo hendenan a sclavisa otro hende aki riba nos isla. Por ta bo lo adescubri cu bo hendenan no tabata ni shon ni catibo. Por ta bo descubri cu bo hendenan tabata shon y catibo.
E team lo kier presenta e video instructivo Nos tur ta un famia den e barionan rond di nos isla. Pa haci esaki ta pidi Centro di bario y organizacionan cu ta traha cu e adulto mayor pa traha hunto cu nos den e realisacion di e proyecto aki. Nos meta ta pa presenta e pelicula den 30 bario. Nos ta spera cu despeus di e presentacionan den bario cu por lo menos 25 persona busca nan informacion riba e website y avisa nos di nan accion. Di nos curason nos ta spera di encurasha hopi mas hende pa mira e importancia di haya sa nan storia en conexion cu sclavitud y comparti nan storia cu nan famia y si por cu e resto di e comunidad.
Den e barionan ta bay tin e posibilidad pa bo por papia cu un team. Si bo kier papia di locual bo a descubri, den en registro di catibo riba e website di Archivo Nacional Aruba, na un manera mas priva señora Peterson ta ofrece e posibilidad pa bo por comunica cu su persona via email.
Banda di Fonds Cultuurparticipatie e proyecto aki tin e apoyo y sosten di Archivo Nacional Aruba y di Stichting Rancho. Nos ta aprecia si nos por haya e sosten di otro hende y organizacion. E articulo aki ta marca e comienso di e proyecto. E proyecto ta tuma luga durante e periodo di un aña cuminsando awe dia 8 di november 2023 y ta worde clausura dia 8 di november 2024.
E proyecto a worde haci posibel door di Fonds voor Cultuurparticipatie. Fonds voor Cultuur-participatie ta duna sosten na initiativa cu ta stimula particpacion na cultura. Si bo kier pa nos duna un presentacion di e video na bo grupo bo por tuma contacto cu nos.
Ta bay tin e posibilidad pa bo por sigui nos riba Facebook: Nos tur ta un famia.
Riba Diahuebs 9 di november cu ta World Freedom Day di Merca, e organisacion ta habri un email adres pa bo esaki ta: This email address is being protected from spambots. You need JavaScript enabled to view it.
