Cu un director nobo, awor Arubahuis por concentra riba e 5 pilarnan cu nan a stipula pa nan mes

Prome Minister Evelyn Wever-Croes:

ORANJESTAD (AAN): Durante conferencia di prensa di Gobierno, Prome Minister Evelyn Wever-Croes a anuncia cu Arubahuis lo tin su directora nobo pa comienso di December 2023, cu lo ta sra Joselin Croes.  Manera ta conoci, Arubahuis ta representacion di Aruba na Hulanda y Europa, y pesey ta importante pa tin un Arubahuis stabiel.

   Cu e nombramento di sra Croes, awor Arubahuis lo por concentra riba e 5 pilarnan cu nan a stipula pa nan mes. Prome Minister a indica cu ta importante pa logra fortifica e 5 pilarnan aki, pa asina Aruba ta mas visibel, y alavez crea mas oportunidad pa nos hendenan.

   E prome pilar ta enfoca riba e prioridad cu nos hendenan. Esaki ta conta pa tur Arubiano cu ta bay Hulanda pa biba of studia, of cu ta eynan pa motibo medico. E di dos pilar ta e tarea den Gobierno di Reino, paso Aruba tin un rol akinan, y Arubahuis como nos representante lo yuda den esaki.

E di tres pilar ta e tarea den Union Europeo, paso akinan tambe Aruba tin un rol pa hunga y Arubahuis lo yuda akinan tambe. E di 4 pilar, ta e cooperacion cu institutonan Hulandes, Aki ta referi na Gemeente di provincianan, otro institutonan manera hogescholen y universidadnan di e sector comercial, tur diferente instituto cu mas cooperacion, paso esaki lo trece cune mas oportunidad pa Aruba y nos hendenan. Por ultimo, cu ta e di 5 pilar, ta cooperacion cu embahadanan paso con cu bay bin Arubahuis ta nos representacion na Hulanda y Europa, y e cooperacion cu embahadanan ta importante.

   "Cu esaki, ohala cu na December caba, tin un director nobo, y un candidato nobo pa bira Minister Plenipotenciario na Washington. Unabes cu Aruba tin su representacion na Washington, e lo por remplasa sra Croes, pa asina e por cuminsa funcion an Hulanda como directora di Arubahuis. Manera cu nos haya e ultimo indicacion di Hulanda, nos lo anuncia tambe, ken ta bra e candidato nobo pa Minister Plenipotenciario na Washington" Prome Minister a expresa.

{gallery}Cu un director nobo, awor Arubahuis por concentra riba e 5 pilarnan cu nan a stipula pa nan mes{/gallery}