FLP y pueblo Arubiano a celebra amor pa idioma Papiamento

22 aña di oficialisacion: E lucha pa Papiamento ta sigui

ORANJESTAD (AAN):   Diaranson anochi na Biblioteca Nacional Fundacion Lanta Papiamento a celebra hunto cu comunidad di Aruba 22 aña di oficialisacion di Papiamento y tambe 16 aña cu FLP ta activo.

            Por a mira un sala completamente yen di publico cu a comparti y experencia un anochi special cu un programa varia cu a inclui poesia, musica di e reconocido Johnny Scharbaay y e hoben pianista Gian Giel.

            Durante e anochi aki Dr. Joyce Pereira a presenta un charla tocante e tema: Kico a logra te awor y kico falta? E balor di Papiamento pa nos desaroyo. Ademas Ramon Todd Dandaré Mag. Ling. a presenta e charla: Di fruta pa raiz – Encuentro cu origen . E representantenan di Wikipedia Papiamento tambe tabata presente pa duna splicacion di nan plataforma.

            Pa finalisa e fundacion a haci varios reconocimento na personanan importante como miembronan honorario.  E anochi a caba cu un brindis pa celebra y pa haya inspiracion pa sigui cu e lucha. Apesar cu por bisa cu pueblo Arubiano stima su Papiamento, mester sigui lucha pa un reconocemento total.

            Sigur un anochi espectacular y un celebracion masha bunita.