Rudy Leydsner, Presidente di FMTB:
ORANJESTAD (AAN) – Rudy Leysner, Presidente di Fundacion Movimento ta Bida (FMTB), den entrevista cu DIARIO a bolbe splica, cu desde aña pasa nan ta bezig cu Fisiofit dirigi na adulto mayor. Nan a cuminza den nuebe bario, pero e aña aki nan ta den dies bario. E actividad aki ta financia pa CEDE Aruba.
“Kiermen, nos a pone un bario mas acerca, cu ta Noord pero nos ta den tur y na YMCA. Pues, tur dia nos tin fisiofit mainta y atardi. E gruponan ta wordo parti den tres: Gruponan cu ta vital, gruponan cu ta menos vital, y gruponan cu mester di atencion special, por ehemplo hendenan cu ta riba rolstoel”, Leysner a splica.
Ta den tur bario ta mas accesible pa adulto mayor yega lihe. “Y nos kier mas hende, aña pasa den tur e barionan nos tabata tin entre 250 pa 300 persona. Pero nos kier haya mas! Adulto mayor, por fabor e ta gratis, pero den algun bario ta cobra 5 florin pa e les, y esey ta pa cubri gasto di airco, y nos ta compronde esey, pero nos ta duna e servicio completamente gratis”, el a señala.
Pues tin un Fisioterapista, unda nan a haya e subsidio for di CEDE Aruba, y aña pasa tabata tremendo. “Nos a weita e resultadonan for di momento cu nan a cuminza, y nan no tabata asina activo. Y kico nan por haci aworaki? Bo ta mira un enorme progreso!” el a remarca.
Rudy Leysner a sigui bisa cu ora un adulto mayor ta haci actividad fisico y ehercicionan, e ta cambia. Su mente tambe ta activo, pues e persona no solamente ta fisicamente activo pero mentalmente tambe.
“Dus, bo ta haci contacto cu hende. Ora bo bira grandi bo kier tin contacto cu otro, bo kier tin contacto social, y esey falta hopi pa e grandinan. Hopi grandi ta nan so na cas, y eigenlijk nan mester di mas cooperacion, mas ayudo y esaki mi ta kere cu nos, den un grupo of ora un organizacion mester wordo forma, pa e hendenan ey mester di ayudo special”, Rudy Leysner a comenta.
{gallery}Awo cu a agrega Noord, Fisiofit ta den dies bario{/gallery}
