‘Flotas Petroleras Ecuador’ lo considera Aruba como nan hub pa e region Caribense

Ministro Glenbert Croes sorprendi cu viahe a duna mas resultado

ORANJESTAD (AAN): Durante conferencia di prensa di gobierno, Minister Glenbert Croes a anuncia un otro oportunidad cu a bin pa Aruba durante su biahe pa Ecuador.

   E mandatario a splica cu den cuadro di cooperacion entre gobierno di Ecuador y gobierno di Aruba a surgi e proposicion pa e compania FLOPEC (‘Flotas Petroleras Ecuador’) lo por uza Aruba como nan hub den e region Caribense. Esaki sigur ta un tremendo noticia  pa loke ta e uzo di e tankinan ,”tank farm” cu tin na Refineria di Aruba (RDA) y pa e actividadnan maritimo den region.

   E uso di Aruba como hub tambe lo bay genera placa pa e companianan di logistico cu ta duna servicio na barconan cu ta ancra den e awanan teritorial of cu ta haciendo operacionnan den e awanan territorial, ademas di lo brinda oportunidadnan laboral.

   Minister Glenbert Croes ta sumamente optimista pa cu e “move” pa convence FLOPEC establece su mes na Aruba y scohe Aruba como “hub” pa nan actividadnan den region. “E biahe pa Ecuador a duna mas resultado di loke mi a spera” Minister Croes a expresa.

   Mirando e interes den e diferente proyectonan cu ta bay bin y tur e proposicion cu tin pa Aruba, lo por spera di wak un boost economico grandi pa gobierno, pa San Nicolas, pa e contratistanan, comercio y e pais en general.