Marco Berlis cu preguntanan fuerte
ORANJESTAD (AAN): Mey-mey di siman, ata Parlamentario Marco Berlis di MEP ta lanza un serie di pregunta na Ministro, y ta bisto cu e ta buscando informacion riba proyectonan energetico fracasa di Mike Eman!
Segun berlis, pa ocho aña largo AVP a showcase y gaba cu e futuro berde pa Aruba. Kico tur nan a logra haci pa e vision aki cu mester a hiba Aruba na 2020 na energia 100% berde? Prome, AVP hamas a logra pone un molina di biento na Aruba. Loke si AVP a laga atras ta un extension di un contract regalo pa parke di Vaderpiet te cu 2029.
Un regalo di Mike Eman na Vaderpiet na balor di 216 miyon Florin sin cu vaderpiet ta sigui inverti den e molinanan, pa via cu nan no a haya e contract di Urirama. 216 miyon Florin di placa di pueblo cu nunca nos lo por recupera. Adicionalmente, e prijs actual cu ta cumpra di Vaderpiet ta masha halto mes compara cu e parke di molina cu lo bin na Rincon. Vaderpiet ta cobrando $0.11 p/KW mientras e tecnologia nobo di molina na Rincon lo ta bao di $0.045 p/KW. Esaki ta otro evidencia y muestra di e maneho desastroso di Mike Eman y con e ta regala sumanan miyonario na empresanan Biyonario y laga pueblo masacra pa paga e megadebe te cu 2044.
Sorpresa di e proyecto solarpark di aeropuerto: Otro proyecto di energia dudoso cu Mike Eman a laga atras ta e solarpark na Aeropuerto. E proyecto aki ta den man di un comerciante y empresa local. E contract ta cai bao di Elmar, sinembargo pusha y imponi pa Mike Eman cu su agenda berde. Awor ta sali na cla cu e prijs pa Kilowatt cu e empresa ta bende Elmar ta hopi mas halto cu Elmar ta bende pueblo! Kiermen cu cada kilowatt cu e empresa bende Elmar, tin un perdida grandi.
Tur esaki a sosode bao signatura berde cu un biaha mas ta show cu proyecto pero cu nunca tabata rendabel! Un proyecto cu ta afectando Elmar y pueblo directamente. Un berguensa total! Ta pa e motibo aki mi a manda preguntanan aden cerca Minister di Energia sr. Glenbert Croes pa investiga e contract aki y purba saca informacionnan afo ta kende tur ta parti di e bagamunderia aki. Ademas ma pidi tur cifranan cuanto placa Elmar y pueblo a perde y ta perdiendo te cu September 2022 desde cu e proyecto aki a cuminsa! Pueblo ta pagando un proyecto cu un contract di 25 aña den cual Elmar y pueblo ta perde cientos di miyones di Florin, pasobra friends and family di AVP mester gana placa bruto! Di mi banda, pueblo por ta convenci cu mi lo pidi un investigacion riguroso riba e caso aki.
Otro proyectonan fracasa bao AVP ta e famoso Flying Wheel cu a costa WEB y pueblo 25 miyon Florin y ainda ta gastando miyones pasobra despues di tanto aña ainda e no por funciona! Mester evalua si mester scrap e proyecto aki pronto pa WEB por recupera mas liher, por baha prijs di coriente y scapa miyones di Florin di pueblo. Otro proyecto fracasa di AVP ta esun cu ECO Gas pa produci gas pa WEB, un proyecto cu nunca a funciona cu a costa WEB y pais 17 miyon Florin y un caso den corte. Ainda bo ta kere den e proyectonan energetico di e “bon comun fracasa”? Ainda bo ta kere AVP ta di confia? Mas nos busca mas puito nos ta haya scondi den e macuto berde!
