BUENOS AIRES: Un Fiscal di Argentina a pidi e siman aki pa Husticia bay mas profundo den e investigacion riba e tripulantenan di e avion di carga di regimen di Nicolas Maduro,
cu ta grounded na e pais Sur Americano, pa asina haya sa eventual vinculonan cu terorismo.
E avion tabata bula cu 19 persona abordo, pero solamente nomber di 14 Venezolano ta aparece riba e lista. Cinco nomber di tripulantenan Irani no tabata wordo poni riba e lista. Danki na wowo atento di oficialnan na Paraguay, a bin detecta esaki, y asina e investigacion riba e avion Boeing 747-300M di e aerolinea Emtrasur a cuminza plama rond.
Emtrasur ta un aerolinea cu regimen di Nicolas Maduro a crea na Venezuela, y ta encarga cu transporte di carga. E avion ta uno cu antes ta pertenece na Mahan Air di Iran, y awor a dune un matricula venezolano, a verf e bandera di Venezuela riba dje, y ta bulando rond actuando hopi sospechoso. Pasobra un avion di carga normal tin 6 of 7 persona so abordo. Esun aki tabata bula cu 19 hende.
Fiscal Cecilia Incardona na Argentina a presenta un documento cerca Huez Federal Federico Villena, unda el a mustra cu e investigacion haci te cu awor na Argentina a topa cu varios retrazo, y pesey awor ta haya necesario pa sigui cu e investigacion principalmente riba e piloto Gholamreza Ghasemi, tambe di tur tripulante cu ta depende di dje, di e avion, y di su carga.
E avion a yega Argentina dia 6 di Juni procedente di Mexico despues di a haci un escala na Venezuela. Su destinacion tabata Aeropuerto di Ezeiza cu ta keda net pafo di Buenos Aires, pero mester a haci un aterizahe no planea na Aeropuerto di Cordoba pa motibo di mal tempo.
Dia 8 di Juni, e avion a lanta for di Ezeiza pa bay Uruguay pa busca jetfuel, pero el a bin baha bek na e Aeropuerto, pasobra Uruguay simplemente a cera su espacio aereo pa e avionnan di Emtrasur.
Huez Villena a duna ordo pa kita paspoort di e tripulantenan (5 Irani y 14 Venezolano), y a pone beslag riba e avion.
Fiscal Incardona a indica cu Argentina a ricibi rapport di FBI di Merca, cu e avion di e Boeing 747 aki ta fungi como director ehecutivo y ta miembro di conseho di administracion di Qeshm Fars Air, cu ta un compania cu ta duna asistencia na Forzanan Quds, cu ta meti hopi cu terorismo. Mahan Air cu ta e doño anterior di e avion, tambe tabata coopera semper cu teroristanan.
Pa e Fiscal na Argentina, nan tin di investiga si e berdadero meta di e avion bulando riba Argentina tabata exclusivamente pa transporta pieza pa auto, of si e tabata eventualmente planea pa un ‘acto di preparacion pa suministra bienes of placa’ cu por wordo usa pa un actividad di terorismo.
Fiscal Incardona a pidi pa acredita na un forma confiable pa haya sa kende ta doño di e avion, y pa confirma si Mahan Air ainda tin vinculo cu e avion of no.
Pa e Fiscal tin algun inconsistencia tambe den e informacion encuanto e tripulacion, y a pidi pa Husticia haci un investigacion mas profundo riba e aspecto aki.
El a pidi tambe pa mas investigacion pa cu e contenido di e carga, pa asina haya sa si e operacion comercial declara, ta cuadra cu e contenido real di e mercancia cu tabata wordo transporta cu e avion.
Fiscal a sugeri pa Huez pidi 11 material nobo di prueba, e.o. e peticion na Merca pa informa si e piloto Ghasemi ta wordo investiga den algun proceso hudicial na Merca, y kier sa tambe si medidanan a wordo tuma pa asina limita su libertad aworaki na Argentina, y tambe si acaso beslag tey riba e avion, of ta un embargo of restriccion formal.
