Por registra caba pa e prome siman:
ORANJESTAD (AAN) – Instituto Biba Saludable y Activo (IBiSA), a yama un conferencia di prensa, den cual William Erasmus y W. Hoek, di Team Afdeling, tabata presente. Erasmus a cuminza indicando cu e biaha aki nan ta haci e presentacion di IBiSA Camp-2022.
E Camp aki ta bay tuma lugar for di dia 18 di Juli te cu 5 di Augustus, y lo wordo dividi den tres siman, den tres diferente Camp.
E prome Camp ta programa di 18 te 22 di Juli, e di dos ta di 25 pa 29 di Juli y e ultimo siman ta di 1 te 5 di Augustus.
Erasmus a informa cu diaranzon aki a cuminza cu registracion pa e prome siman, dia 29 ta inicia cu registracion pa e di dos siman, y dia 6 di Juli ta cuminza cu registracion di e ultimo siman.
El a splica cu nan a prefera di parti’ e asina, den tres siman, pa duna oportunidad na mas mucha pa participa, y esaki ta un “feed back” cu nan a haya di aña pasa, vooral pa e muchanan cu no a logra registra aña pasa.
IBiSA Camp ta bay pa 100 mucha pa cada siman. Nan ta bay tin dos localidad. Por ehemplo, e prome siman na Playa y na San Nicolas. Cada localidad tin capacidad pa 100 mucha; kiermen, un total di 600 mucha lo participa den e tres Campnan aki di IBiSA.
E prome siman (18-22) nan lo ta na Centro Deportivo San Nicolas y na Centro Deportivo Betico Croes; e di dos siman (25-29) nan lo ta na Savaneta y Centro Hubenil Washington; y ultimo siman, lo ta den Centro Deportivo San Nicolas atrobe, y Centro Deportivo Frank Figaroa.
“Nos coordinadornan ta bezig aworaki cu e preparacion, kiermen e actividadnan cu lo tin. E aña aki lo ta diferente, unda no ta organiza deporte so, pero lo hinca otro temanan y actividad. E prome siman, por ehemplo, nos lo enfoca un tiki riba agricultura cu naturaleza. E ora ey e muchanan por expect algun actividad cu e temanan aki”, Erasmus a menciona.
Pa e di dos siman e temanan ta Tecnologia y Ciencia, y e ultimo siman ta “Arts & Craft” cu un tiki mas di deporte.
“Den tur nos actividad den nos Camp bo ta haya e parti di deporte den dje y esey ta standard”, Erasmus a remarca.
El a indica tambe cu durante e actividadnan aki e muchanan lo haya sandwich y algo pa bebe y tin algo di bebe tambe durante full e maintanan di actividad.
William Erasmus a agrega cu nan lo bishita cinema tambe, ademas di water-park, unda e muchanan lo haya cuminda cayente despues di e actividad tanto den parke como despues di cinema. E muchanan lo haya un flanel tambe.
E Camp aki ta special pa muchanan di 6 pa 12 aña, y tin un prijs hopi razonable envolvi. Erasmus ta considera cu e suma ta hopi economico, mirando loke nan ta haya pa e actividad cual ta hopi.
