ORANJESTAD (AAN) – Manera ta conoci, Diaranzon cu a pasa, trahadornan di Arubus a bay den accion di protesta den oranan di mainta.
No por kita afo cu nan tin derecho di mustra nan disgusto y pidi sosten di nan sindicato (aworaki SEPPA), pasobra DIARIO tin entendi cu ta añanan cu nan ta kedando atras den salario, y claro e efectonan financiero di Covid-19 te ainda ta afectando nan, mescos cu tin otro companianan ainda den problema.
Sinembargo, y esaki ta ora tin manifestacion di cualkier instancia di gobierno cu ta duna servicio na e publico, e usuarionan ta esnan cu a keda perhudica cu tardanza di e busnan. No solamente e pasaheronan local cu ta bin di San Nicolas via Santa Cruz of via Dakota, mester a warda hopi rato pa haya bus, pero ademas keda warda masha largo pa haya bus pa e ruta di hotel.
Turistanan mes tabata puntra rond cuant’or tin bus, ya cu e terminal tabata practicamente bashi mainta, y hopi di nan, DIARIO ta reitera, mester a busca unda pa scapa un poco di e solo pisa y calor sofocante.
Un turista Argentino a haci un critica pisa riba e situacion di e terminal di Arubus. El a bisa cu e ta gusta biaha y cu hasta den e paisnan menos desaroya, un terminal di bus ta un lugar cu dak, cu baño, cu un snack maske sea chikito of un tienda unda por cumpra algo pa bebe manera boter di awa y alomenos buscuchi come. E no por kere cu na Aruba, e Isla feliz y cu tanto ta wordo propaganda pa su desaroyo, tin un terminal di bus cu ta laga asina hopi di desea.
Un pasahero local a comenta cu menos mal e trahadornan di Arubus tin un sindicato cu ta para nan tras y nan por manifesta, mustra nan disgusto. Pero e usuarionan no tin ken pa para nan tras y nan ta e partnernan di mas importante pa e compania, pasobra ta esnan cu dia aden dia afo ta uza e bus y ta paga balente tarifa. Minimo, usando smartcard, e pasahero comun cu ta bin trabao bay cas cu Arubus, ta gasta entre 6 pa 12 florin pa dia na transporte. Solamente e 60 plusnan ta haya 40 trip gratis, y loke ta bin acerca nan, logicamente, tin cu paga. Y si nan ta traha ainda, tambe tin cu saca cen pa paga Arubus pasobra e 40 tripnan ta caba den un rato di ora. Ohala SEPA y gerencia di Arubus por resolve e asunto y yega na un acuerdo cu nan trahadornan, specialmente cu e chofernan cu ta esnan cu ta hiba y trece nos hendenan tur caminda cu nan tin cu bay, fuera di nan servicio pa turista cu sin duda ta importante y ta genera entrada pa Arubus.
