ORANJESTAD (AAN) – Juffrouw Joraine Oduber, Director Adhunto na Filomena College MAVO, a menciona den conferencia di prensa, relaciona cu e celebracion di e di 75 aniversario di e scol,
cu e motibo di e eventonan cu nan ta organizando aworaki, ta mas tanto mirando cu e scol ta den un etapa innovativo.
“Nos ta bezig ta cambiando un tiki di rumbo unda nos ta purba di prepara nos muchanan pa e mundo moderno pa e tempo cu no tin ainda of no a yega ainda. Mirando esaki nos kier haci e eventonan banda di celebra e di 75 aña di scol, pero tambe e parti innovativo, smart TV’s den klas, yudando y dunando e docentenan e tools necesario pa por uza e materialnan manera mester ta, pa nan por hinca of traha nan lesnan na unda cu e miho cualidadnan di e muchanan por wordo saca, y mirando cu e muchanan por caba scol no solamente cu un diploma, cu a haya e vaknan, pero nan skills y cualidadnan necesario pa draai den e mundo aworaki”, Juffrouw Oduber a subraya.
Tambe e alumnonan, mescos cu e scol, ta hopi activo y nan mester di un espacio pa haci deporte, y un stage unda nan por expresa nan talento y mustra esaki na un forma mas bunita. Scol no tin esaki ainda.
“Anto, pa tur esaki nos mester fondo. Nos sa cu aworaki ta un momento dificil pa e economia di Aruba, pero no imposible. Nada ta imposible, na momento cu bo ta traha pe. Pesey, nos como Filomena ta keda kere den e confianza di nos hendenan rond di nos, mescos cu nos lema ta bisa: ‘Filomena ta ami, ta bo, ta nos. Nos tin generacionnan y generacionnan cu a pasa den e scol aki, y nos ta kere cu cada un di nan ta keda parti di Filomena y hunto nos lo logra pa nos sigui bay dilanti”, Joraine Oduber, Director Adjunto, a conclui.
