Conocido barco Arcangel Miguel a sink riba lama entre Aruba y Colombia

Barco yen di carga a topa lama bruto

ORANJESTAD (AAN): E ta un di e barconan di carga cu hopi biaha ta yuda transporta carga for di Aruba pa e demas isla y paisnan den region.  E ta sirbi tambe pa trece carga for di Venezuela y tambe for di Colombia.

   Desde cu e frontera cu Venezuela a cera, e barco Arcangel Miguel a keda sirbi Aruba, y a bira uno cu regularmente ta viaha entre Aruba y Colombia.  E tabata trece hopi carga di productonan Colombiano pa Aruba.

   Arcangel Miguel ta un boto di carga, cu un largura mediano, esta di 18 meter. Su hanchura ta 6 meter.  E ta nabega bao bandera Venezolano, cu matricula YYT2836.

   Diabierna e barco Arcangel Miguel a bandona Waf di Barcadera bek rumbo pa Santa Marta, Colombia.  El a sali for di Aruba cu basta carga pa hiba pa Colombia. Sinembargo algo a socede riba e ruta aki.  E barco Arcangel Miguel tambe ta dispone di e sistema di tracking AIS, cu ta un ‘Automatic Electronic Exchange’ cu ta transmiti constantemente su ubicacion, su velocidad, y su direccion.

   E ultimo biaha cu e AIS aki di e barco Arcangel Miguel a transmiti, tabata Diabierna anochi trempan pa 6:56 pm (ora di Aruba).  E momento ey e barco tabata 5.6 kilometer zuidwest di Divi Dutch Village net pabao di ex-Bushiri Beach Resort.

   Kizas e capitan mes a paga e AIS system, pues el a sigui nabega bay Colombia sin cu si ‘AIS identification’ ta cendi.

   Boto a kapseis prome:  Sinembargo te Diasabra anochi 21 di Mei, alrededor di 9:05 pm, a drenta informacion cu Arcangel Miguel a confronta problema.  Debi na esaki el a kapseis, y esaki a pone e barco yena cu awa rapidamente.  Finalmente el a sink cu velocidad rapido.

   E presencia di un sistema di presion halto riba parti west di Caribe, for di 70º West te cu 77º West, tabata produci automaticamente lama hopi bruto.  Olanan tin biaha di riba di 8 pia tabata wordo topa cune.  Y esaki ta e hipotesis di loke a wordo confronta riba lama.

   E barco a kapseis y sink den area di Puerto Estrella, na pueblo di Uribia, na departamento di La Guajira, na Colombia.  Esaki ta como 135 km west di Punta Brabo na Aruba.

   A ser treci dilanti cu den e barco tabatin 7 miembro di tripulacion ora cu e barco a kapseis y bay abao.  Como cu tabata nochi den e scuridad, tabata dificil pa a mira si tur hende a sali for di e barco ora cu el a bay fondo.  Tin algun cu e momento ey tabata drumi.

   Venezuela tambe yudando: Den prensa a sali informe, cu ta solamente un persona a keda bibo na prome instante, esta Juan Carlos Sanchez.  El a logra di salba su mes ta drief riba un boto salbabida.  El a bati alarma cerca algun piscado cu el a logra topa cu nan.

   Di e forma ey a core notifica Marina Colombiano, y tambe Guardacosta Colombiano cu a cuminza mobiliza pa e area.

   Juan Carlos Sanchez a declara na autoridad, cu ora e barco a sink, e no a mira ningun otro persona mas a logra salba nan mes.

   Segun Instituto Nacional de los Espacios Acuaticos (INEA) di Venezuela, ta cu nan tambe a manda unidad di Guardacosta Venezolano pa duna un man den e buskeda aki, y ta colaborando cu oficialnan Colombiano.

   Dialuna den dia a drenta informacion cu e curpa sin bida di 1st Officer, esta Lino Alberto Gomez Galicia a wordo haya ta drief.  El a wordo saca di lama.

   Pero te na ciere di edicion, ainda falta pa localiza e co-pilot Ledy Rafael Mata, e hefe Jose Antonio Salazar Malvar, e bosun Juan Carlos Sanchez Sanchez, y demas miembronan di tripulacion Jose Alberto Sanchez Nuñez, Andry Jose Narvaez Sanchez, y Jose Manuel Vizcaino Frontado.