ORANJESTAD (AAN): E tabata un competencia regional masha grandi mes den pasado.
E Festival di OTI tabata un competencia unda tur pais na Latino America, Merca, y tambe Spaña tabata manda participante pa purba di bira e mihor cantante di e aña ey. Y na varios ocasion Aruba a participa na esaki, y sali den finalista tambe! Un di esnan grandi cu a gana den finalista ta e conocido Claudius Philips.
OTI ta e Organizacion di Television Iberoamericana na cual Tele Aruba tabata miembro di e organizacion.
E prome Festival di OTI a tuma lugar na November 1972 na Madrid (Spaña). E ultimo competencia di esaki tabata na Acapulco (Mexico) na luna di Mei 2000.
Awor cu ta bay observa e di 50 aña cu e prome Festival di OTI a tuma lugar, plannan a wordo traha pa resucita esaki bek, pero e lo bay haya un otro nomber. E canal RVTE di Spaña ta pensa di yama e evento simplemente “Hispavisión”.
Esey ta loke e president di RTVE, esta José Manuel Perez Tornero a anuncia, mustrando cu e Festival nobo aki tambe lo ta dirigi na e paisnan di habla hispano.
‘Hispavisión’ lo bay ta un Festival di musica cu ta wordo crea na estilo di Eurovisie den cual tur pais uni pa idioma spaño por participa. El a bisa cu ya caba a forma un grupo di trabao pa hinca e Festival aki den otro.
Prome lo ta na 2023: E prome edicion di Hispavisión, segun Perez Tornero lo bay ta otro aña na Cartagena, Colombia. Esaki nifica cu tur e trabao ya ta basta avanza cu hopi hende lo pensa.
Ademas di papia di e sede den cual nan lo tene e prome festival di e competencia, el a bisa tambe caba cu nan lo conta cu Brasil y Portugal como paisnan invita pa competi den Hispavisión.
Di e forma aki, y apesar cu nan lenguahe principal no ta Spaño, toch nan por participa den e evento den calidad di invitado, di mesun forma cu ta socede cu Australia den Eurovisie. Algo cu ya tambe a socede antes den Festival di OTI, unda a participa tambe paisnan manera Aruba, Antiyas Hulandes, Merca y tambe Canada. Tanto na 1992 y na 1993, e Festival di OTI a logra di haya 25 pais participante.
