Festival di Dande 2021 lo tuma lugar den forma presencial y cu distanciamento fisico so

Inscripcion ta cera Diabierna awo: --- ORANJESTAD (AAN) – Aaron Arenas, Organizador di Dande-2021, a yama un conferencia di prensa pa informa cu e festival di Dande ta bay door,

despues cu aña pasa tabata tin un cambio drastico, unda cu el a bay completamente virtual.

El aña aki ta bay bek na e forma con a wordo celebra na 2019, cu ta presencial. Arenas a menciona cu solamente ta bin un cambio, cu ta cu ta bay bin cu stoel y mesa, cu ta reglanan cu nunca prome a tene cuenta cune, pero cu awo si mester hacie: distanciamento social, control. Vacuna y tapaboca aworaki no ta importante pa e festival aki, pero mas tanto e distancia fisico.

El a agrega cu un banda por participa completamente, y no ta bay tin limitacion di musico riba escenario, pues unicamente nan mester cumpli cu e horario pa e festival termina, cu ta 1 or di madruga.

E festival lo tuma lugar e dianan 27 y 28 di December, di 7’or di anochi te cu 1’or di madruga. Dia 27 ta festival di adulto y dia 28 ta festival infantil-hubenil y ambos lo tuma lugar den Centro di Bario Tanki Leendert, parti pafo na unda e escenario lo wordo transforma completamente diferente, bunita diseña pa loke ta e celebracion.

Aaron Arenas a menciona cu e inscripcion a cuminza caba, y esaki si ta virtual, via Fundacion Cultural Festivalnan Folklorico y Comision Promove Cultura.

Aaron Arenas ta invita henter comunidad di Aruba, mayornan, instructornan, lidernan di banda, famia di e muchanan y hobennan cu ta interesa den e festival di Dande pa tuma contacto cu e organizadornan, pa por participa den e festival di Dande 2021.

Tuma nota si, cu ultimo dia pa inscripcion ta Diabierna 17 di December y e ta cera pa 12’or di madruga. Dia 20 di December lo anuncia tur e participantenan y bandanan, mirando cu diadomingo 19 pa 5’or tin tiramento di lot. E dia ey lo haya sa e secuencia di e participantenan cu lo bay tey.

Arenas a agrega cu e Festival di Dande tin otro categorianan tambe, manera propio composicion y esun tipico. Pa infantil-hubenil tin solamente e categoria di Dande y propio composicion. Den adulto ta na unda tin e tres categorianan Dande, propio composicion y tipico.

E festival infantil-hubenil su categoria di edadnan ta: 4-6 aña, 7-9 aña, 10-12 aña y 13-17 aña; y pa adulto ta 18 aña bay ariba. Den cada categoria lo saca rey of reina di Dande y di dos y tres lugar; y den adulto, lo saca rey y reina di Dande.