SANTO DOMINGO: E cantante Fernando Villalona a uni su mes na e grupo di musiconan di merengue cu a sali positivo pa Covid-19, cu ta mesun cos cu su amigonan Eddy Herrera y Rubby Perez.
“Mi kier informa publico y empresarionan di contract, cu mi a sali positivo pa e PCR-Test di Covid-19, y mi lo asumi mi responsabilidad di ciudadano responsable,” el a bisa via un boletin.
E cantante conoci como ‘El Mayimbe’ a cancela tur su actividadnan te cu proximo aviso. Esaki ta inclui presentacionnan publico y priva cu e tabatin riba schedule.
Eddy Herrera: E merenguero Eddy Herrera a bisa via un boletin riba Diamars cu el a sali positivo pa Covid-19.
“Mi kier a informa boso cu Diamars madruga mi a sinti hopi sintoma di griep y otro malestar, y mi a dicidi bay haci un PCR-Test, y esaki a sali positivo,” e informe di Eddy Herrera ta indica. El a bisa cu el a bay den isolacion, pero alavez ta wordo atendi pa su neumologo. Pasobra e ta pasando den algo manera un griep pisa.
Eddy Herrera a yama tur hende cu e tabatin contacto cune den ultimo dianan pa nan tuma e medidanan necesario y bay den cuarentena. E ta pidi disculpa tambe cu e no por atende e actividadnan pa cual e ta programa.
Rubby Perez: Den ultimo dianan aki, Rubby Perez tambe a anuncia cu el a sali positivo pa Covid-19, y pesey el a cancela tur fiesta cu e tin programa pa e dianan venidero.
E artista a bisa ademas, cu e si no a haya sintoma pisa.
“Te cu awor, danki Dios, mi no a haya sintomanan cu ta bira un preocupacion y mi por keda trankil den isolacion,” Perez a indica den un boletin riba social media.
El a ofrece disculpa tambe na publico cu e no por bay duna presentacion, y ta spera cu nan tin comprension pa e situacion aki.
E ta disculpa cu publico di Miami y Boston, y di Santo Domingo pasobra ey nan tabatin compromiso. Pero awor plannan a cambia.
Pavel Nuñez: Siman pasa tambe, e cantante Pavel Nuñez a divulga cu el a sali positivo pa Covid-19, y pesey mes el a pospone tur su actividadnan artistico, incluyendo su concierto ‘Bin Band Nuñez Tropico”.