ORANJESTAD (AAN): Sigur un bon noticia! DIARIO a compronde cu e Departamento di Infrastructura y Planificacion (DIP) cu hopi orguyo ta anuncia cu entrante 1 di januari 2022 lo drenta na vigor diferente servicio nobo digitalisa online pa aplicacion.
E proceso aki ta uno cu a tuma su debido tempo pa organiza y prepara pa e por bay worde implementa. Di e forma aki DIP ta dal un paso importante den modernisa su servicionan na comunidad y alaves haci e proceso mas transparente, eficiente y husto pa e cliente.
Entrante prome di januari 2022 un ciudadano of comerciante por haci uzo di su computer, iPad of telefoon pa subi e website di DIP y haci su aplicacion online mes. E persona of compania interesa por yena e formulario digital disponibel.
E servicionan cu ta worde digitalisa ta: (*) Peticion pa un tereno erfpacht residencial. (*) Peticion pa un tereno comercial den e areanan cu tin tereno disponibel. (*) Peticion pa permiso di precario. (*) Tambe por re-inscribi pa tereno residencial.
Pa comunidad ta miho informa di e paso inovativo aki, DIP lo organiza anochinan informativo pa asina un y tur por ta na altura di con pa haci bon uzo di e servicio nobo digitalisa aki cu DIP ta ofrece comunidad.
