DIARIO a anticipa un fin di vacacion Hulanda cu cambio politico
*Lider di ”Nieuw Sociaal Contract” no kier bira Prome Ministro
*Eleccion 2023 ta conoce e buelta cu tin Aruba tambe na careda
ORANJESTAD (AAN) — Pa atende cu mundo politico mester tene na consideracion e realidad cu creacion di suspenso, ta favorece e persona cu ta percura pa e suspenso.
Pieter Omtzigt ta e persona cu a causa mayor suspenso na Hulanda, despues cu el a bira lomba pa e partido CDA cu e tabata representa y rurmornan cu e lo bini cu su propio partido, a haya un neishi.
Cu Omtzigt ta sigur un bon politico, y asina tambe un contrincante peligroso pa tur cu aspiracion politico na Hulanda, sigur a wordo confirma den e hecho cu e no a confirma cu e ta participa na eleccionnan 2023.
Na momento cu temporada di vacacion a haya su inicio na Hulanda, el a bay cu vacacion cu e declaracion cu e ta bay pensa y na final di vacacion lo anuncia su decision.
Mientras vacacion na Hulanda tabata mas un silencio carga cu tension prome cu tormenta rementa, ayera Pieter Omtzigt tabata den noticia atrobe pa anuncia cu e lo participa na eleccion 2023 cu su propio partido.
“Nieuw Sociaal Contract”sin duda ta un nomber cu ta permiti tur direccion politico.
E ta duna indicacion cu atencion di Omtzigt lo bay pa e tantisimo problemanan social cu Hulanda ta enfrenta, manera DIARIO cu prueba a trece dilanti.
Omtzigt ta papia di un contrato nobo cu e lo cera na urna electoral cu Pueblo di Hulanda, cu durante e eleccionnan regional na 2023, a mustra cu e ta duna mas y mas sosten na e partido BoerBurgerBeweging.
Kico lo pasa awor cu e progreso politico di BBB, cu a duna indicacion di ta un Gobierno nacionalista, mester bira conoci e siman aki.
Omtzigt a haya popularidad enorme den e tempo cu e asina yama “toeslagen affaire”cu tabata un compensacion pa yiu, a bira un scandal grandi na Hulanda cu hasta a papia di actonan importante di corupcion.
E tin potencial grandi den e proximo eleccionnan segun tur informacion.
Na momento cu mester a forma Gobierno Rutte 4, problemanan a presenta cu Omtzigt, cu a haya un “burn out”den e conflicto politico cu su partido cu el a bandona.
For di e momento a wordo papia di posibilidad pa e uni na otro partido y den esaki hasta a wordo pensa cu e lo por bira parti di BBB y asina crea un partido super poderoso na Hulanda.
E union entre Omtzigt y BBB nunca a wordo realisa y participacion di Omtzigt na e proximo eleccionnan a keda un misterio politico, cu awor a haya un contesta.
Sinembargo, ta surgi un problema pa su votadornan pasobra Omtzigt a anuncia cu e mes lo no kier bira Ministro Presidente y e no kier un victoria aplastante.
Un actitud politico basta serio pasobra mientras publico ta entusiasma cu e ta participa, te ainda no ta conoci kende lo ta su candidatonan y kende lo bira Ministro Presidente di Hulanda si e haya suficiente voto (cu e no kier aparentemente) pa e forma Gobierno.
DIARIO ta sigui desaroyonan politico na Hulanda cu ta bira tur dia mas interesante mientras eleccion ta acerca.
Importante pa DIARIO ta keda kico eleccion na Hulanda na September ainda lo haci cu Aruba cu Hulanda kier exigi pa acepta RAft si e kier un solucion pa e yudansa di 500 Miyon Florin cu el a ricibi di Hulanda pa por a sigui cana den e pandemia.
Con e panorama politico Hulandes lo ta na caminda pa September 2023? DIARIO lo sigui informa Aruba cu luho di detaye!
