Gino Goeloe, director:
ORANJESTAD (AAN) – Pa conclui e entrevista cu señor Gino Goeloe, Director di Wit Gele Kruis (WGK), relaciona cu embarazo hubenil, el a referi tambe na con e famia di e mucha ta reacciona, sea ta duna sosten of sea saca e hoben foi cas, y incluso ora no tin solucion y mama jong tampoco kier su baby.
Tin mayornan cu ta acepta pero tin famia cu no ta acepta, y ta bisa e mucha pa bay biba otro caminda, cerca un omo, tanchi, ompi, etc. Esey ta pone hopi presion riba e mucha. Por ta e ta bay na su wela of welo, den otro ambiente, y esaki por trece cune cu e mucha ta drenta den depresion.
Goeloe a comenta cu ora cu nan ta wak un situacion asina, WGK tin henter un sistema rond di dje, unda cu señora Monique Gil Abath ta cay aden, y e tin henter su team y diferente partners cu ta traha cune, hopi di cerca, ta wak con por yuda e mucha mas tanto posible, y ta papia cu e famia. Esaki pa wak si e mayornan por acepta y duna nan e parti di consuelo y sosten.
“Tin casonan cu mester di ayudo profesional y ta haya cu stichting Respaldo y Hunto ta cay aden, unda cu nan a haya e clientenan aki, y ta yuda vooral e mayornan cu e mucha pa asina aki, e por bay na e miho manera posible. E esaki ta e parti cu WGK ta zorg pa esey”, Goeloe a indica.
Ademas si e mucha ta den situacion cu placa no ta yega WGK ta bati na porta di Departamento di Asunto Social, y si tin un caso cu ta foi man, cu no tin aceptacion di mayor, y e mucha no kier e baby, eynan Voogdijraad ta cay aden cu DAS. “Y asina nos tin nor partnernan cu nos ta traha hopi direct cu nan, pa nan bienestar general y di e baby tambe.
E baby cu a nace no por yuda cu el a nace den un situacion un poco bruha, anto nos tin cu percura pa e baby ey ta safe y cu e por haya un futuro sigur”, director di WGK a señala.
