FCCA ta lansa sistema digital pa entrega di oferta 'DigiBID'

Un inovacion na Aruba

ORANJESTAD (AAN): Fundacion pa Cas pa Comunidad Arubano (FCCA)  orguyosamente ta anuncia y introduci DigiBID, un inovacion na Aruba. DigiBID ta un sistema nobo y completamente digitalisa pa entrega di ofertanan. Cu e iniciativa aki, FCCA ta sigui duna prioridad na modernisacion di su procesonan, mehorando eficiencia, transparencia y accesibilidad pa tur contratistanan, grandi y chikito, y tambe e empresanan den construccion na Aruba. Awor tur contratista y empresanan den construccion por entrega nan oferta digitalmente via e portal DigiBID riba  www.fcca.com. 

Registracion ta obligatorio

Pa por hasi uso di DigiBID, interesadonan lo mester registra prome riba e plataforma. Tur esnan cu kier participa den un destaho di FCCA por bishita www.fcca.com y selecciona DigiBID den e menu principal pa cuminsa e proseso di registracion. 

FCCA mester aproba e peticion

Despues cu e usuario yena tur informacion necesario y upload e documentonan rekeri, FCCA lo revisa e peticion. Na momento cu FCCA aproba e registracion, e usuario lo ricibi un email cu un un link cu instruccionnan pa activa su cuenta. E usuario mester warda e credencialnan cu e lo ricibi hopi bon, asina e por participa den futuro na e destahonan di FCCA. Tur comunicacion relaciona cu destaho lo tuma luga digitalmente. 

Solamente ofertanan via DigiBID lo wordo procesa

Cu e lansamento di DigiBID, FCCA lo procesa solamente ofertanan cu wordo entrega via e plataforma digital. Esaki ta nifica cu lo no ta posibel mas pa manda oferta  via email; locual ta contribui na un proseso mas lihe, sigur y transparente. 

Beneficio di DigiBID

DigiBID ta ofrece hopi beneficio: e ta facil pa usa, lihe, y sigur. E usuario por inicia un sesion na cualkier momento riba e plataforma. Ademas e sistema ta scapa tempo, yuda reduci uso di papel, baha gasto y optimalisa e manera di traha.

Mas importante  di DigiBID ta  cu e sistema ta completamente seya  (sealed) na momento di entrega di un oferta. Esey kiermen cu e sistema no ta laga ningun hende habri ningun oferta te na e momento di e fecha di e destaho. Riba e fecha di destaho tur oferta lo wordo habri. 

Modernisacion

Cu e inovacion aki, FCCA ta reafirma su compromiso cu un servicio moderno, eficiente, transparente, accesibel y sigur pa tur esnan cu a entrega un oferta. Alabes cu introduccion di DigiBID, FCCA  ta fortalece confiansa, claridad y rapidez den tur etapa di e proseso.

Pa mas informacion tocante DigiBID of pa asistencia durante e proseso di registracion, interesadonan por tuma contacto cu Customer Service na 522 3322 of manda un email na This email address is being protected from spambots. You need JavaScript enabled to view it.

FCCA ta invita tur interesadonan pa registra awe mes y conoce e plataforma nobo DigiBID riba www.fcca.com.