Director di CMO, Rino Hermans
ORANJESTAD (AAN): For di e momento cu e fuerte temblor a dal Venezuela, Crisis Management Office (CMO) Aruba a activa su preparacion pa coordina e apoyo cu Aruba por brinda. Durante e ultimo dianan, CMO a traha intensivamente pa prepara e mision logistico cu ta permiti cu e prome ekipo di asistencia humanitario sali rumbo na Venezuela.
Prome Minister Mike Eman tabata presente na Aeropuerto Internacional Reina Beatrix (Jet-TNCA FBO) pa e salida di e prome 11 boluntario.
Diadomingo mainta director di CMO, Rino Hermans tambe tabata presente, e preparacionnan a enfoca riba manda e personal cu tin e conocemento y certificacion necesario pa haci un bon evaluacion di e situacion y prepara e siguiente fase di e operacion. “For di cu e temblor a tuma luga, nos a cuminsa inmediatamente cu e preparacionnan logistico. Den e prome fase nos a decidi di manda persona certifica pa maneha logistica den un situacion di desaster, pa asina prepara e trabou pa e ekipo medico cu lo sigui.”
E dos specialista di CMO cu a sali awe ta certifica den coordinacion y logistica di desaster y a sigui entrenamento specialisa na Hulanda. Durante nan mision, nan lo reuni informacion importante riba e necesidadnan den e area afecta y lo mantene contacto continuo cu e “back office” na Aruba. “Nos ta creando e base pa e siguiente dos buelo cu ta planea pa otro siman. Den vez di manda hopi material sin sa exactamente kiko mester, nos kier manda solamente loke realmente tin necesidad.” Segun Hermans, e prome 72 ora despues di un desaster normalmente ta enfoca riba rescate di e victimanan. Awor cu e fase ey ta pasando, e enfoke ta cambia pa asistencia humanitario y cuido medico.
“E fase aki ta dura aproximadamente dies dia. Pa esey e ta importante pa e prome ekipo haci un bon evaluacion, pa asina e siguiente ekipo por yega completamente prepara.”Hermans a destaca cu e capacidad cu Aruba a mustra ta confirma cu, a pesar di ta un pais chikito, e tin e conocemento y e capacidad pa responde na emergencia internacional. “Nos ta sigui prepara nos profesionalnan y nos ta sigui fortalece nos capacidad. Esaki ta mustra cu Aruba tin e conocemento y e capacidad pa actua rapidamente, tanto localmente como den misionnan internacional.”
E mision aki a bira posibel danki na e coordinacion estrecho entre Crisis Management Office (CMO), Cruz Cora Aruba, y diferente partner nacional como internacional. Bou di liderazgo di Prome Minister Mike Eman, Gobierno di Aruba a coordina tur e preparacion logistico, administrativo y diplomatico necesario pa haci posibel cu e prome ekipo di asistencia humanitario Arubiano por sali rumbo na Venezuela.
