POH Jasmira Mora, Coordinador:
*Y puntra si den famia tin malesanan cronico
ORANJESTAD (AAN)-- Coordinador di Seccion di POH, Jasmira Mora, den entrevista cu Matutino DIARIO, a indica cu nan ta trahando conhuntamente cu DVG y IBiSA, den e proyecto “Sa bo numbernan”.
“Nos ta purba haci e chekeonan na pia di trabao. Kiermen, si bo ta un hende cu ta hopi druk, bo no tin tempo, nos mes ta bay na bo pia di trabao y haci e chekeo. Si ta resulta cu enberdad bo presion ta halto, nos ta bay recomenda bo pa bay bo docter di cas. Si bo docter di cas tin un POH miho ainda, pasobra di biaha e ta bay trata bo. Como POH mi ta manda un mensahe pa mi colega y e ta tuma contacto inmediatamente cu e pashent akinan y asina ta sigur cu e ta wordo atendi”, Mora a detaya.
Pa locual ta e hobennan cu no ta cuida bon di nan salud, nan no ta alimenta manera mester ta, Jasmira a splica cu loke POHnan ta haci ta duna mas informacion posibel, encurasha e hobennan pa cuida nan salud. Nan ta bisa cu un bez cu bo tin 21 aña, purba cuminza haci bo controlnan, pa nan ta trempan, pa wak kico ta nan pronostico y wak cu tempo si enberdad tin riesgo cu nan presion por subi of no.
“Algo hopi importante tambe ta cu nos ta ripara cu hobennan mas jong no sa tampoco si nan mayornan ta sufri di presion halto, of por ta, diabetes of cualkier otro malesa cronico. Y esakinan ta datonan hopi importante pa bo sa, pasobra si bo tin’e den famia bo chensnan ta mas halto ainda pa bo por sufri di presion halto den e caso aki, y esey ta lamentabel pasobra si bo sa esaki caba bo por cuminza cu e parti di prevencion mas lihe posibel”, POH Jasmira Mora a señala.
