Casonan den Corte contra Gobierno ta exigi Parlamento critico
*Posibel fiesta cu tereno durante ocho aña ta papia di fayo vigilancia
*Parlamento ta wordo eligi pa evita caso den Corte cu ta hoga na beach
ORANJESTAD(AAN)—Awe Aruba , den un crisis mundial historico, ta wordo confronta cu un caso den Corte, den cual un ex Ministro ta wordo acusa di a abusa di su posicion si resumi tur e cargonan cu tin contra Benny Sevinger.
Ta di lamenta cu pasion politico di su partido a yega asina leu, cu Sevinger como acusado, a wordo permiti di keda Representante di Pueblo di Aruba.
Na e momento cu mas Aruba mester di trankilidad absoluto pa den un situacion mundial serio sigui cana, un caso penal contra un ex Ministro afecta e confiansa cu Pueblo mester tin den su sistema politico.
E caso di Husticia contra Benny Sevinger no ta algo unico pero ta otro caso mas cu na prome lugar ta mustra dede riba Parlamento, cu a wordo introduci pa evita abuso politico contra Pueblo.
Un resumen di casonan den Corte den cual politiconan ta envolvi, ta mustra directamente riba e falta di Parlamento pa haci su trabou y controla gobernacion na Nomber di Pueblo.
Tin abuso di Pueblo cu ni sikiera ta alcansa sala di Corte manera sigur ta e caso cu e proyectonan di Bo Aruba, cu tin mes base y principio cu loke a bira Caso Fondo Desaroyo Nobo San Nicolas.
Den ambos caso por mira cu den Parlamento tin un mayoria forma pa e partido na mando na e momento cu tanto den Caso Fondo Desaroyo Nobo San Nicolas como den e Proyectonan Bo Aruba, tabata e mayoria di AVP.
Con por ta posibel cu sin control di Parlamento, cu e momento tabata di AVP, e lider di AVP Henny Eman, tabata dirigi un Gobierno cu sin autorisacion debido di Parlamento a dicidi di uza un fondo pa un proyecto den cual no a cumpli cu e Ley di Contabilidad?
E pregunta ta surgi si den seno di e partido, nunca miembronan a descubr cu nan gobierno ta lansa un proyecto, cu no ta cuadra cu loke ley ta exigi pa gasta placa di Pueblo y placa cu no tin aprobacion ni control di Parlamento ta wordo gasta.
Mes situacion ta presenta su mes despues cu e coleccion di proyecto di Bo Aruba, pa cual Parlamento sin mas ta entrega Mike Eman 1.6 Biyon pa el a spart manera e kier hunto Benny Sevinger, sin tene e basico di Ley di Contabilidad na bista?
Aruba ta den problema serio pasobra na tur dos ocasion e mayoria den Parlamento a permiti loke no por wordo permiti.
Despues di e escandalo cu permiso den cual Corte a condena e ex Ministro di Gobierno Mike Eman, Paul Croes, awe ta sigui e caso Benny Sevinger cu ta kita tur atencion pa e cantidad di persona envolvi.
Mester haci cierto preguntanan pasobra si loke tin skirbi den e acusacionnan ta cuadra cu berdad, e mayoria di AVP den Parlamento atrobe a prefera nan Ministro riba bienestar di Aruba.
Parlamento no a ripara cuanto hende yega na partido tabata haya tereno? No tabata controla trabou importante di tereno cu ta uno di e problemanan social grandi di Aruba? Cuanto pober no kier un tereno pa nan por traha nan cas?
Atrobe Aruba ta den luz negativo cu gobernante como acusado den e caso Avestruz, cu ta exigi Parlamento di Aruba haci su trabou y saca su cabez for di bou di tera.
Tempo a pasa, gobierno a cambia pa bin descubri cu segun acusacion durante ocho aña tabata tin fiesta cu tereno di Pueblo?
Aruba ta conoce otro caso den cual su gobernantenan mester presenta dilanti Huez. Awe Pueblo mester di un compromiso nobo di Parlamento, cu ta cuminsa cu e hecho cu un persona acusa pa crimen y sigur acusado dilanti Huez, no por ta Representante di Aruba.
Un tempo dificil mundo conoce actualmente. Un tempo den cual mester pone un punto final na gobernacion cu casonan penal contra gobernantenan cu ta goberna e pais aki na Nomber di un Pueblo, cu no merece di wordo pusha den lodo di criminalidad!
