Como ex Ministro Presidente y lider di AVP e no ta testigo den Corte
*Paul Croes for di Miami a logra paralisa accion autoridad na Ponton
*Mike no por dirigi Gobierno si e no sa kico ta pasa den su Gobierno
ORANJESTAD(AAN)—Mientras confusion grandi a wordo crea den mundo politico di Aruba, pafor di bista di Pueblo, e escenario tabata wordo prepara pa tratamento di e caso criminal contra Benny Sevinger, cu pa colmo ainda ta Miembro di Parlamento di Aruba.
Dia 5 di September, e bom, pa cual DIARIO tabata completamente prepara, a rementa cu informacion di Corte riba cual DIARIO a amplia cu noticia exclusivo pa Pueblo di Aruba.
A base di entre otro peticion di abogadonan, por a mira ayera con funcionarionan halto actual y di pasado di DIP, a wordo scucha como testigo a base di entre otro peticionnan di abogadonan.
Awe mas testigo lo wordo scucha entre nan Jan de Ruijter, cu hunto cu Michael Williams tabata e prome personanan cu a bati alarma pa posibel actonan criminal cu otorgamento di tereno na Aruba.
E lista di testigo cu te ayera tabata conoci pa fuentenan bon na haltura di DIARIO, no ta inclui e nomber di Mike Eman, cu segun informantenan ta e persona cu como Ministro Presidente di e pais, mester ta na haltura di loke ta pasa den su Gobierno.
A wordo mustra riba e lista largo di nombernan di personanan cu ta acusado hunto cu Benny Sevinger como acusado mayor den e caso aki, cu ta personanan liga directamente na e partido di Mike Eman, cu den e caso di Paul Croes tambe a defende e ex Ministro cu alma y curpa pero no a wordo scucha den e caso mes, como testigo huramenta.
Cu tin un bon relacion entre e Ministronan segun informantenan clave a haya un indicacion serio den un caso cu tabata tin relacion cu Paul Croes.
A wordo mustra riba e desaroyo cu a presenta na un momento cu Paul Croes no tabata na Aruba pero na Miami y autoridad a actua contra un grupo di persona cu na forma ilegal tabata na Aruba.
Paul Croes a wordo informa for di Aruba di e suceso y imediatamente a duna orden pa autoridad no persigui e grupo pero spera su regreso na Aruba pa nan permiso wordo firma.
E caso aki lo a laga un sabor amargo atras cerca autoridad pero segun fuentenan ta un indicacion serio cu hasta na Miami, Paul Croes como Ministro tabata na haltura di loke tabata pasa pa e por a actua.
Informantenan a duna di conoce cu e acusacionnan contra Benny Sevinger a tuma lugar durante dos gobernacion di Mike Eman como Prome Ministro, cu bou huramento por duna informacion sumamente importante y valioso.
A wordo indica na DIARIO cu tin acusado den caso di Benny Sevinger cu tambe tabata menciona den e caso contra Paul Croes y ta miembro prominente di AVP.
Informantenan ta di opinion cu Mike Eman como Presidente di Conseho di Ministro di cual Benny Sevinger tabata miembro, mester wordo considera como valioso sigur si tene cuenta cu e cantidad di acusado y hasta experencia cu Mike Eman tin cu casonan contra Ministro manera tabata e caso contra Paul Croes y casonan cu Mike Eman a conoce como coordinador di su ruman como Prome Ministro.
Informacionnan clave pues ta mustra cu como lider di un Gobierno, Mike mester por duna splicacion di loke por a pasa of no pasa durante un tempo hopi largo y den su circulo directo como Prome Ministro.
Ta bon pa menciona cu un Huez cu a bini di Sint Maarten ta funciona como Huez Comisario mientras cu un Huez di Hulanda ta encarga cu e huicio , den cual ainda presencia di Mike Eman como testigo por wordo solicita.
DIARIO ta creyente di e sistema di Husticia na Aruba y den Reino.
