ORANJESTAD (AAN): Un informacion procedente di Salem (New Hampshire) na Merca, ta indica cu e dama Vincenza ‘Jennie’ (Pentella) Mansour a fayece dos siman pasa na edad di 91 aña.
El a hala ultimo rosea na su cas, den presencia di su famia keri.
Jennie a gradua di Lawrence High School na 1948 y a atende Boston University anochi, mientras den dia e tabata traha na New England Telephone. E tabata e accountant y office manager pa Mansour Construction pa hopi aña.
Jenny tabata hopi activo den actividadnan extra-curicular. E tabata un miembro activo di International Quota Club of Lawrence, y a wordo eligi President y despues District Governor. Danki na su esfuerzonan, a logra crea Quota Clubs na Aruba, Curaçao, y Hulanda.
El a bay laga su casa Raymond G. Mansour cu kende e ta casa 69 aña, y su yiu muher Diane Labrecque. Tambe su ruman muher Grace Fortuna. E tin dos nieto y un bisa-nieta.
Envez di flor, donacionnan memorial por wordo haci na su memoria na St. George’s Orthodox Church, na 8 Lowell Street, Lawrence, Massachusetts 01840.
