‘Calle 16’ di Miami awor tin e nomber di Johnny Ventura

‘Calle 16’ di Miami awor tin e nomber di Johnny Ventura

MIAMI: Durante un ceremonia hopi emocional y cu musica, e commissioner di ciudad di Miami, presidi pa Manolo Reyes, a nombra parti di Calle 16 como ‘Johnny Ventura Way’,

na honor di e legendario cantante compositor, musico y areglista kende tabata encarga pa desaroya y moderniza e sonido di merengue contemporaneo.

   Un plaquette pa cu esaki a wordo ricibi pa e persona cu pa mas di 50 aña tabata casa cu Johnny, esta Josefina Flores de Ventura, hunto cu su yiunan Juan Jose, Euridice, y Jandy, como tambe nietonan, sobrinonan, amigo- y fanaticonan kendenan a bay presencia e acto na e caya cu oficial ta yama 16th Street.

   “Johnny Ventura no tabata djis un artista grandi, e tabata un figura politico cu a lucha pa e derechonan di su pueblo Dominicano y pa tur pueblo oprimi rond mundo manera esnan na Cuba,” commissioner Reyes a bisa.

   Di su banda, señora Fifa y Jandy a gradici tur esnan cu a haci posible e homenahe aki, y a subraya cu Johnny Ventura tabata wordo admira pa comunidad latino na Miami, cu ta un di e ultimo ciudadnan cu el a presenta den su carera cu un orquesta riba escenario.

   Na e ceremonia a mira tambe Presidente di SBS Network (cadena di comunicacion hispano na Merca), Raul Alarcon, tambe Consul General di Republica Dominicana na Miami, Jacobo Fernandez, y e presentadornan di TV Tony Dandrades, Nashla Bogaert, Daniel Sarcos, y e artistanan Jose Alberto ‘El Canario’ y Maffio, e disqueronan Juan y Nelson, kendenan a bin acompaña famia Ventura pa presencia e develo di e borchi di caya, cu a wordo aproba via un resolucion di 13 September 2021.

   Durante su trayectoria, Johnny Ventura a ricibi mas di 4.800 plaquette y reconocimento duna pa diferente entidad publico y priva rond mundo.

   Na 2021 el a wordo reconoci pa Congreso di Merca pa ta un icono di musica Dominicano cu a destaca internacionalmente pa su talento y dedicacion pa mehora su comunidad, y exporta su musica pa Merca, Europa, y Asia.

   Riba Disco el a yega di saca 106 produccion original, a wordo premia cu 28 Disco di Oro, 2 Disco di Platinum, y nomina varios biaha pa Grammy Latino.  Na 2006 el a ricibi e Premio pa Excelencia Musical di Latin Grammy’s.

   Johnny tabata abogado di profesion, y el a gradua summa cum laude na Universidad na Santo Domingo.  Apesar di su carera exitoso, Johnny Ventura nunca a lubida su pueblo.  El a drenta mundo di politica como legislador na decada di 1980, como vice-alcalde di Santo Domingo di 1994 pa 1998, y como alcalde di 1998 pa 2002.

  El a fayece aña pasa na Juli cu edad di 81 aña.