SANTO DOMINGO: Riba Diasabra, 1 Dominicano mas a yega bek su pais despues di a logra evacua for di Ucrania.
Asina pues oficialmente te cu awor, 13 ciudadano Dominicano a logra di bandona un forma of otro e pais cu ta wordo invadi door di Rusia.
Vice-Ministro di Relaciones Exteriores a bay ricibi e ciudadano aki ora cu su vuelo a yega na Aeropuerto di Punta Cana.
Segun Gobierno na santo Domingo, di e 13 Dominicanonan cu a logra bandona teritorio Ucraniano, ocho ta adulto y cinco ta menor di edad.
Via di trabaonan diplomatico via Embahada Dominicano na Alemania, e Dominicanonan a wordo traslada pa Slovakia, Hungria, Moldavia, y Polonia. E paisnan aki a permiti nan drenta nan teritorio cu permiso special pa motibonan humanitario.
Sinembargo tin indicacion cu Gobierno ta sigui track 7 Dominicano mas cu tambe ta buscando forma pa evacua di Ucrania. Nan ta spera cu nan lo por logra y pronto nan ta bek nan pais.
