FAVI cu charla pa crea conscientisacion den comunidad tocante 'cacho di guia'

ORANJESTAD (AAN):   Recientemente FAVI (Fundacion Arubano di esnan Visualmente Incapacita) a organisa un charla cu e tema 'Cacho di guia'.

E cachonan aki ta cay bao di e categoria di 'working dogs' y e intencion di e charla tabata pa conscientisa y educa comunidad tocante e cacho di guia den comunidad.

            Cacho di guia no ta algo hopi conoci na Aruba pasobra no tin ningun persona cu ta cliente di FAVI cu tin un cacho di guia. Pero si tin e deseo pa tin un cacho.

            E rol di FAVI ta pa busca informacion pa e cliente y trece esaki dilanti pa comunidad. Pa e ocasion aki, un señora di Hulanda a haci un presentacion hunto cu su cacho di guia. Esaki tabata un bon oportunidad ya cu e persona a traha cu diferente instancia na Hulanda y institutonan cu ta train cacho pa e bin conta di su experiencia.

            Na Aruba tin cierto bareranan. No ta fout di ningun hende ta djis cu mester bay prepara e leynan di Aruba y e leynan internacional unda cu no tin e discriminacion pa un persona cu limitacion di bista y cu tin un cacho como guia, cu ta fungi como su aliado, su wowonan y cu ta su seguridad pa e por funciona den comunidad.