ORANJESTAD (AAN): Con Aruba ta mirando su turismo pa proximo lunanan y despues?
Tin varios aspecto aki, y e.o. pa mehora e servicio cu e sector di Horeca ta ofrece na bishitantenan den exterior, tin algun paso cu tin di tuma na corto plazo.
Den un entrevista cu Tisa LaSorte, kende ta president y CEO di Asociacion AHATA, el a mustra cu tin cambio pa haci, den sentido pa mira con ta atrae mas empleado pa por duna e servicio optimal. Pero e bista awor pa siguiente lunanan ta basta positivo.
“Pa resto di e aña aki y pa 2023, te awor e bista ta positivo y unico miedo cu tin ainda, cu por pone hende bira tiki dudoso den futuro, ta cu tin inflacion pisa rond mundo, y na Aruba nos ta importa inflacion, y esey ta algo cu ta duna e comerciantenan miedo, y cu por crea recesion na Merca, y esey lo por afecta nos atrobe,” LaSorte a indica.
Tin miedo cu Aruba lo por sigui bira mas caro, y e ora bo ta haya menos turista cu lo viaha debi na e recesion, y tin Gobierno di Aruba tambe papiando di reforma fiscal pa 2023 cu por empeora e inflacion.
Esey ta e miedonan cu hopi profesional den mundo di Horeca tin actualmente, y pesey kizas bo tin hopi compania cu ta prefera di warda pa mira kico ta bay pasa, prome cu nan inverti mucho mas.
Ainda AHATA ta busca forma pa sigui haya solucion pa algun problema cu ta existi. Segun LaSorte, ainda nan ta wardando pa regulacion keda cla pa atende asuntonan di UTV cu tin keho keto bay riba dje.
Tambe AHATA ta kere cu lo por haci mucho mas pa reglamentonan mas estricto pa cu comportacion di companianan riba lama den areanan turistico, pasobra seguridad semper ta algo di importancia. Corda cu turistanan semper kier sinti nan mes safe na beach of cualkier otro lugar cu nan acudi na dje na nan destinacion.
Aki no ta papia djis di crimen, etc., pero pa tin bon iluminacion, voetpad, y lugar pa nan cana liber. Un di e cosnan cu semper a boga pe y cu a haci Aruba popular, ta cu “Aruba ta user-friendly”! Esey ta danki na e hecho cu tur hende ta papia Ingles, papia Spaño, ta acepta Dollars, ta facil pa yega cu hopi aerolinea, etc.
Sinembargo si e no ta safe, e ora nada di esey ta importante. Pasobra parti di e user-friendly aki ta cu e isla mester ta sigur, y sin esey e lo por haci hopi daño na turismo.
Seguridad pa turistanan den areanan hopi bishita, tin di keda como un prioridad.
