Fanaticonan a keda entusiasma pa mira competencianan di Auto Remote Control

ORANJESTAD (AAN): Den fin di siman cu a pasa, DIARIO a mira cu interes ta creciendo den e deporte di habilidad, concentracion, y enfoque,

esta caredanan di Auto Remote Control, cu a carga e nomber “The One Outlaw Shootout”.

   A haci uso di e parkinglot grandi pariba di compleho di Guillermo P. Trinidad den Stadionweg.  Gino Kock di e comision organizador a splica cu nan ta hopi contento cu e empuhe cu nan a ricibi di Ministro di Deporte, Endy Croes, pa yuda cu permiso pa e lugar, y asina a haci e competencia aki bira realidad y un atraccion pa henter famia.

   Como 30 persona a inscribi pa participa den e competencianan aki cu a tuma lugar den oranan di anochi, di 7:30 pm te cu 12:00 am.  Nan a competi den categoria di ‘Street Outlaw’ y tambe categoria di ‘Superstock’, y categoria di ‘Crutch’.

   Den seccion di ‘Powerwheels’, tabatin 20 persona cu a inscribi.

   DIARIO a nota cu Ministro Croes tambe a haya chens di core uno di nan, y el a keda asombra pa e velocidad cu e vehiculonan aki ta genera riba asfalt.