ORANJESTAD (AAN): Den e siman di 17 pa 21 di october 2022 Bureau Integriteit Aruba (BIA) a organisa training pa tur hefe di departamento gubernamental riba e tema “Integridad na pia di trabou”.
E training a wordo duna door di experto riba tereno di prevencion y investigacion di violacion di integridad na trabou.
Durante e prome parti di e training a elabora riba caracteristicanan di comportamento humano y na un forma interactivo a duna atencion na e kompas moral encuanto balornan cu ta importante na trabou. Despues a continua riba desaroyo local y internacional riba e tema di integridad y e tarea y ehempel specifico cu tur hefe di departamento tin.
Al final a caba e training cu diferente caso practico relaciona cu integridad. E parti di e training aki a duna e participantenan e espacio pa delibera riba posibel solucion y a pone enfasis con por minimalisa e risico di violacion di integridad na pia di trabou.
Ademas e training a fungi como preparacion pa un proyecto piloto cu lo cuminsa prome kwartaal di 2023 unda alrededor di 10 pa 15 departamento gubernamental loparticipa. Den futuro cercano BIA lo duna mas informacion tocante e rolnan nobo y e proyecto piloto.
Durante e evaluacion di e training a constata cu e participantenan a keda agradecido cu e training aki y lo desea pa sigi desaroya riba e tema di integridad na pia di trabou.
BIA ta sumamento satisfecho cu asistencia y participacion activo di tur e participantenan durante henter e siman cu a pasa.
