ORANJESTAD (AAN): Tur cos ta mustra cu e Orthodontista conoci como A. Kawaiah procedente di Canada,
kende a wordo gara varios biaha ta trahando ilegal riba e isla, y cu e ta sigui duna servicio na publico, ta gusta comete actonan ilegal. Ta parce cu e no tin comprension na nada, y e ta pensa cu posiblemente ley no ta na vigor pe.
Por corda cu na 2019 caba, con Inspeccion di Salud di Aruba (IVA) a yega di gare ta haci trabao sin cu e tin permiso pa fungi como Dentista/Orthodontista na Aruba. Nan a haci splike, ki tipo di estudio e mester finaliza, y ki caminda e tin di cana pa asina obtene un permiso pa por traha legal.
E Dentista/Orthodontista aki procedente di Canada no a worry cu nada. Loke IVA a bise, a drenta un banda di orea, y sali bek na e otro banda. El a hasta wordo condena na Aruba na e Tuchtcollege.
E no tin cunes kico autoridad na Aruba ta haci! E ta haci bofon di henter e sistema legal y di Salubridad Publico riba e isla, y ta sigui traha. Na October 2020, tanto Ministro di Salubridad Publico, y tambe DVG a ricibi prueba cu e diploma di Kawaiah no ta corecto. Pa colmo a sali na cla cu na Canada el a yega di falsifica carchi di pashent y tambe firma falso.
Esey a pone cu na November 2020, autoridadnan na Aruba a bolbe descubri cu e ta haciendo trabao ilegal. E tabata duna pashentnan cuido oral, sin sigui e linea di conducta y practica cu Ley di Calidad di Cuido ta prescribi.
Desde September 2020 caba tin varios persona cu a djis bisa flat, cu Gobierno tin di cera consultorio di Kawaiah, hala aden su permiso, y expulse for di Aruba.
GARA CU FAKE COVID-TEST:
Ta parce cu Kawaiah ta experto di haci cosnan ilegal. Pasobra awor a bin descubri, cu el a wordo gara na Aeropuerto di Aruba cu documentonan di Covid-Test Negativo, pero cu a resulta di ta falso.
E confirmacion aki a bin di e conocido dentista Henk Marsman cu a haci un denuncia publico pa Gobierno di Aruba, Ministro di Salud, y tambe Departamento di IVA haci algo urgente. Stop di pone man riba cabez di Kawaiah, y expulse di Aruba.
E siman aki e mester a viaha di Aruba pa Miami, y ora cu el a check-in na e aerolinea, el a presenta cu un negative Covid-19 Test. Pero e empleadonan a bin descubri, cu e documento di e test aki ta falsifica.
Imaginabo cu bo tin un Specialista aworaki na Aruba, y ora di viaha pa Merca bo tin di haci un PCR Covid-19 Test cu costa $75. Hasta esey e ta falsifica!
“Kiermeen e Docter aki ta den su DNA e tin e mala maña ey di falsifica cos,” Dr. Henk Marsman kende ta un Dentista cu semper ta promove bienestar di e specialistanan di diente na Aruba, a indica den un entrevista. Riba e potret por mira Dr. Marsman.
Ora cu e descubri Orthodontista payaso Kawaiah cu e test falso, nan a yama Polis y tambe DVG cu a bay check kico ta pasando. Tanto Polis y DVG a check e QR-Code riba e documento cu ta falsifica tambe. Pero ta parce cu nan a djis laga Kawaiah cana bay, sin ningun clase di detencion.
Cu a lage cana bay, ta un demostracion con Gobierno y Instancianan mes ta laga corupcion sigui cana bay. Siendo cu den e caso aki, por a haci un denuncia na Ministerio Publico con un persona asina ta falsifica un documento asina importante. Aki sigur Inspeccion di IVA tin di actua cu man mas fuerte, como cu e homber aki no tin e Decreto Ministerial
E speranza tey cu Ministro Dangui Oduber lo busca forma pa stop e actitud ilegal aki di un persona cu cada biaha ta demostrando cu e no tin ningun intencion di cumpli cu leynan di Aruba, y mustrando ningun respet pa autoridad.
Pasobra te ainda, por mira cu tanto DVG como tambe IVA ta djis keda keto, envez cu nan defende pashentnan local di Aruba.
Ta increible pa kere cu un persona cu ta falsifica un Covid-Test na Aruba, ainda ta cana liber. Esey nifica cu kende cu ta por falsifica un Covid-Test y tambe cana liber despues?
Ohala IVA por investiga kico e lo ta skirbi den carta di pashentnan na Aruba, of kizas kico e ta falsificando eyden, mescos el a haci caba na Canada.
A keda demostra cada biaha, cu e homber Kawaiah aki no tin remordimento pa nada loke el a haci.
