Dos marinier arubano a haya nan Decreto Real for di man di Gobernador Boekhoudt

ORANJESTAD (AAN): Gobernador di Aruba, Su Excelencia Alfonso Boekhoudt, diahuebs mainta a haci entrega oficial di un Decreto Real (Koninklijk Besluit)

na dos marinier Arubano na honor di nan promocion na Marinierskazerne na Savaneta. E entrega a tuma luga na Cas Ceremonial di Gobernador. LTKOLMARNS Art van Beekhuizen, Comandante di Marinierskazerne, tambe tabata presente na e ocasion aki.

Richard F. Kelly a ricibi su Decreto Real den cuadro di su promocion cerca e personal militar di Aruba di ‘eerste luitenant der mariniers van Aruba’ (ELNTMARNAR) pa ‘kapitein der mariniers van Aruba’ (KAPTMARNAR).

Daniel M. Vrolijk a ricibi su Decreto Real, den cuadro di su nombracion como officier cerca e personal militar di Aruba den e rango di ‘tweede luitenant der mariniers van Aruba’ (TLNTMARNAR).

Despues di e entrega oficial, Gobernador di Aruba a tene un audiencia cu señor Van Beekhuizen. Durante e audiencia, Gobernador a haya informacion riba diferente topico, entre nan e trayectonan di Profesionalisacion di Milisia Caribense y e trayecto di Formacion Social.

Potret: © Kabinet Gouverneur Aruba