ORANJESTAD (AAN): Positive Foundation ta presenta pa di cinco biaha e popular concierto di gospel ‘Aruba Bo ta bendiciona’ dia 1 di April venidero pa 7’or di anochi den Cas di Cultura.
Glen Penniston, Presidente di Positive Foundation ta organiza e concierto di gospel aki cu e meta pa conscientisa cada ciudadano con bendiciona nos ta pa biba riba e isla maraviyoso aki. E concierto ta pa comunidad en general y tambe specialmente pa nos adultonan mayor, pa nan tambe sinti cu Aruba ta aprecia y balora nan pa tur locual nan a nifica pa nos comunidad. Tur esaki ta posibel danki na e partnernan cu ta haci posibel pa e hendenan grandinan di varios cas di hende grandi tambe por presencia e concierto.
Positive Foundation a invita e biaha aki e popular cantantenan di cancionnan di gospel Juano Coco, Angelique Klooster di Curaçao y for di Hulanda e cantante cu hopi hende ta pidi pe, Willy Rodriquez. Di Aruba nos tin nos conocido cantantenan Eltienne Yarzagaray, Luigi Cortes y Jerrino Bass. E famoso cantantenan lo presenta cancionnan cristian y inspirativo pa asina trece fe y speranza cerca tur cu presencia e concierto aki.
Positive Foundation ta invita un y tur pa bin presencia e concierto di ‘Aruba bo ta bendiciona’ y sinti con bendiciona cada un di nos ta y nos isla ta na tur momento. Nan a cuminza bende carchi caba.
