Famianan convenci cu homber haya morto na Zeewijk a ser asesina

Indicacion cu dos homber a mate y despues horta su auto

ORANJESTAD (AAN): Famia ta sperando cu investigacion di parti di autoridad, lo por yuda determina kico exactamente a pone cu nan ser keri Frans a ser haya Diabierna mainta morto otro banda di caminda dilanti Santana Catolico na San Nicolas.

   Tabata Diabierna pa 7:55 am, yamada a drenta na Polis cu hendenan ta mira un homber drumi banda di caminda, na altura di Santana Catolico na Zeewijk.  Polis a yega y bin haya un homber di edad grandi, abao benta y e no ta duna señal di bida.  A pidi presencia di Docter, como tambe Recherche y oficialnan forensico di BFTO.

   Esey ta debi na e hecho cu a bin haya e homber den un posicion no-natural, y tambe tin señal di violencia na su cara.

   Fiscal a laga confisca e curpa pa asina Pathologo haci un autopsia clinico y determina e causa exacto di su morto.

   Sinembargo famia ta convenci cu un acto criminal a socede aki y cu a kita bida di nan ser stima Francisco Angela, mihor conoci como Frans.  E ta wordo considera como un “hende di tur hende”, pues ta persona trankilo, ta gusta treat hende, siendo cu e mes no ta huma ni bebe.

   Frans a wordo mata:  Famianan mes a cuminza investiga y a bin haya sa cu ultimo lugar cu hendenan a mire Diahuebs 17 di Maart 2022 tabata na un conocido establecimento na Cura Cabay.  Aki dos persona a subi cune den auto.

   Kico a pasa no ta conoci, pero famia ta convenci cu e dos hendenan aki ta responsable y kizas a secuestra Frans, y somete na diferente maltrato, kizas cu e meta pa horta su placa, y na final a mate, y den scuridad di madruga a djis para e auto banda di Santana, y pushe for di e vehiculo y pesey el a wordo haya den forma no-natural eybao.

   E auto mes a wordo haya despues door di autoridad, laga atras den area di Mariniers Kazerne na Savaneta.

   Dialuna caba tabata 4 dia cu esaki a socede, y ainda famia no a haya sa kico a socede.  Ministerio Publico a duna e curpa liber caba riba Diadomingo pa e famianan, sinembargo no a ni duna informacion kico e autopsia a divulga ni nada.  Ta parce cu Ministerio Publico ta tumando mes direccion di “keda keto” manera cu nan a haci cu e DJ hoben cu a wordo pusha for di Parkinglot di Mall na Palm Beach.

   Famia ta pidi pa yama Tipline:  Tambe famianan ta spera cu e caso aki lo no bay den doofpot y keda hopi aña sin wordo soluciona, manera a socede cu esun di Poentje Castro.

   Frans tabatin antes un Snacktruck cu tabata staciona na e cruzada di Lagoweg cu Caya Captain Rodgers na San Nicolas.  E ta un bon persona, stima su yiunan y famia completo.  Hopi biaha bo ta haye su so riba guitara ta suministra entretenimento.  E tin un curazon grandi, pues e ta gusta treat tur hende.  Kizas e mesun forma di proceder aki lo a pone dos delincuente kere cu aki ta un persona cu facilmente por horta placa di dje.

   A ser treci dilanti, cu famianan no por compronde con tin hende cu mente criminal asina pa ranca bida di un otro persona, sin ningun clase di piedad.  Den pasado, famianan a yega di duna conseho na Frans pa e “stop di confia” den tur hende.  Esey ta habri caminda cu kizas e dos delincuentenan aki ta hendenan cu Frans mes tabata yuda!

   Aunke Polis mes oficialmente no a pidi yudanza di publico, awor si famianan ta haci un suplica na cualkier persona cu riba e madruga di Diahuebs 17 di Maart pa Diabierna 18 di Maart, a mira algo di Frans, of si nan a mire e anochi di Diahuebs cu hende, por fabor yama Tipline di Polis na 111-41 pa duna detaye.  Corda cu nan ta garantiza cu bo ta keda anonimo.

   Famianan ta spera cu cualkier hende eyfo cu sa algo, pa por fabor duna tip.  Nan kier pa tin husticia pa morto di Frans.  Tambe nan ta desea tur oficialnan di Recherche di DAR-3 di San Nicolas, hopi sabiduria y perseverancia pa yuda soluciona e caso.

   Mientras tanto, unico informacion cu autoridad a duna prensa oficialmente te ainda, ta cu e “caso ta bao investigacion pa saca afo kico por ta e causa di e morto”.

   Na famia di e fayecido, DIARIO ta manda su mas profundo palabra di condolencia.