ORANJESTAD (AAN): Colegio Laura Wernet-Paskel (CLWP) a cumpli 60 aña di existencia na maart di e aña aki.
Na juli a celebra na nivel di scol cu e alumnonan nos di 12 lustro cu un Santo Sacrificio di Misa pa tur nos alumnonan cu un bishita na cinema y celebracion na scol.
E fin di siman cu a pasa a celebra. A habri e fin di siman cu un fiesta organisa pa Señora Sharine Geerman, Roy Angela y CLWP. Aki a recauda fondo pa sigui cu nan proyecto di un Biblioteca y un espacio multifuncional pa scol y pa bario di Santa Cruz.
Un tremendo fiesta. Un exito rotundo. Nan a gradici Señora Sharine Geerman cu semper a coopera pa recauda fondo pa e proyecto pa medio di un plakaat.
Diadomingo a habri cu un Santo Sacrificio di Misa na unda nos a conmemora 60 aña di fayecimento di e Gran Dama Señora Laura Wernet Paskel, cu nos scol ta carga su nomber cu orguyo.
Tambe pa gradici y celebra añanan di servicio di dos colega, 25 aña di juffrouw Winifred Kaarsbaan y 30 aña di juffrouw Milène Croes y nos 60 aña di scol.
Despues di e Santo Sacrificio di Misa a sigui un ceremonia cu ponemento di krans na graf di Señora Laura, na unda di parti di famia Señor Rudy Lampe a hiba palabra y di parti di scol cabesante Juffrouw Bernadetta Figaroa-Geerman.
Aki nos a conmemora Señora Laura su fecha di fayecimento, na unda nos a pone enfasis riba e bida remarkable di Señora Laura d.f.m. Nos a para keto na su memoria pa reflexiona con significante su bida tabata. E tabata pionero riba diferente tereno, E tabata un di e prome ser femenino cu a bay studia na Hulanda pa maestro. Un di e prome dama cu a subi lista politico y cu a lucha na Aruba pa hende muhernan tambe tin un stem riba nivel gubernamental y haya derecho di voto. E tabata core riba su scooter pa bay su trabou. E tabata tin un biblioteca na su cas na unda e tabata fia buki na pueblo, frere, pastoor y souernan.
Señora Laura a laga un manuscrito atras cu despues a publica na un buki cu ta hiba e titulo,’Ons Eilandje’ na unda na un manera bunita a describi e bida di antaño di Aruba.
Nos tabata honra cu presencia di e dos yiunan di Señora Laura d.f.m., cu ta Andres (Dechi), y Inca Wernet, cu ta su unico yiu muher.
Prome Minister, Evelyne Wever-Croes a honra nos cu su presencia. Tambe nos minister di Enseñansa y Deporte, Endy Croes y directora di SKOA, juffrouw Anuesca Baly.
A sera e mainta aki cu un brindis na Centro San Martin, unda nos a celebra nos 60 aña di existencia, nos hubilarionan y e bida significante di e dama na ken nos scol ta nombra. Nos ta gradici Señora Betty Werleman cu su nieta Nealeny Tromp cu a deleita nos e mainta aki cu propio composicion riba tambu.
Aki sr Dechi Wernet, a sorpresa nos Prome Minister, e directora di SKOA y e cabesante di CLWP cu un obsequio di un edicion di e corant Antiliaans Dagblad na unda a sali e prome parti di e ‘Ode aan Laura Wernet-Paskel” cu e escritor Henry Habibe a dedica na Sra. Laura d.f.m.
Merecidamente a nombra e Señora aki, banda di Señor Betico Croes cu ta e figura masculino di milenio, como e figura femenino di milenio.
Ta gradici Señor Elias Aarab, un docente di Ingles di 37 aña, di descendiente Arubano,
biba na Hulanda cu a entrega un peticion na Hulanda pa nombra un caya na Señor Laura Wernet-Paskel, cu Hulanda a acepta.
E coronacion riba e bida remarkabel cu Señora Laura Wernet-Paskel d.f.m. a hiba ta e dedicacion aki di un caya na Hulanda, Den Haag na su nomber.
{gallery}Colegio Laura Wernet-Paskel a gradici, celebra y conmemora{/gallery}
